બાળકોના નાજુક હાથે રોપાશે ભવિષ્યના વિશાળ વટવૃક્ષો

હરિયાળા ભવિષ્ય તરફ એક સુંદર પગલું

કરજણ -1 પ્રાથમિક શાળાનો અનોખો પર્યાવરણ યજ્ઞ! "બીજ બોલ" અભિયાન

​વાલીઓ, શિક્ષકો અને વિદ્યાર્થીઓનો સહિયારો સંકલ્પ – ધરતીને બનાવીશું ફરી લીલીછમ

પ્રકૃતિ પ્રેમી દક્ષાબેન લાલજીભાઈ પટેલની પ્રેરણાદાયી સફર

આણંદ ટુડે | કરજણ
વડોદરા જિલ્લાના કરજણ ખાતે આવેલ કરજણ - 1 પ્રાથમિક શાળા પરિવાર દ્વારા તાજેતરમાં એક પ્રેરણાદાયી પર્યાવરણલક્ષી પ્રવૃત્તિનું આયોજન કરવામાં આવ્યું હતું. જેમાં બાળકો, વાલીઓ અને શિક્ષકોએ ઉત્સાહભેર સાથે મળીને માટીના નાના-નાના બોલ બનાવી તેમાં વિવિધ વૃક્ષોનાં બીજ ભર્યાં હતા. સહિયારા પુરુષાર્થથી સેંકડો બીજ બોલ તૈયાર કરવામાં આવ્યા છે.
તૈયાર થયેલા આ બીજ બોલમાંથી કેટલાક બોલ વડોદરા પર્યાવરણ સંરક્ષણ ગ્રુપ તેમજ રાજ્યકક્ષાના પર્યાવરણ સંરક્ષણ ગ્રુપને મોકલવામાં આવશે.
આ સમગ્ર આયોજન પાછળ પ્રકૃતિ પ્રેમી દક્ષાબેન લાલજીભાઈ પટેલનું માર્ગદર્શન અને પ્રેરણા રહેલી છે. તેમણે અત્યાર સુધી પોતાના જીવનમાં હજારો વૃક્ષો વાવ્યા છે અને સતત પર્યાવરણ સંરક્ષણ માટે સક્રિય પ્રયાસો કરી રહ્યા છે. તેમનો આ અથાક પરિશ્રમ સમાજ માટે એક દીવાદાંડી સમાન છે.તેમણે કહ્યું હતું કે વધુમાં વધુ વૃક્ષોનું સર્જન થાય, આપણી પ્રકૃતિ સમૃદ્ધ બને અને પર્યાવરણ સંરક્ષણનો સંદેશ જન-જન સુધી પહોંચે.
"એક વૃક્ષ, સો આશીર્વાદ." ચાલો, આપણે સૌ પણ પર્યાવરણની રક્ષા માટે આગળ વધીએ અને ધરતીને વધુ હરિયાળી બનાવીએ.
આવો, આપણે પણ સંકલ્પ કરીએ કે આપણી આ સુંદર ધરતીને પ્લાસ્ટિક મુક્ત અને હરિયાળી બનાવીને આવનારી પેઢી માટે એક સ્વસ્થ વારસો છોડીએ.