આણંદમાં નવરાત્રીની ધૂમ, ભક્તિ અને સંગીતના તાલે ખેલૈયાઓ ઝૂમ્યા

આણંદમાં નવરાત્રીની ધૂમ, ભક્તિ અને સંગીતના તાલે ખેલૈયાઓ ઝૂમ્યા

શહેરનાં ચાર ગરબા ગ્રાઉન્ડ પર ભક્તિમય માહોલ છવાયો 

આણંદ ટુડે | આણંદ

શક્તિ, ભક્તિ અને સંસ્કૃતિના પર્વ આસો નવરાત્રીના પ્રારંભ સાથે જ આણંદ શહેર ગરબાના રંગે રંગાઈ ગયું છે. મા જગદંબાની આરાધના, ભવ્ય સજાવટ, રંગબેરંગી રોશની અને ઢોલના ધબકારાઓ વચ્ચે શહેરનાં ચાર ગરબા ગ્રાઉન્ડ પર નવરાત્રી મહોત્સવનો ઉત્સાહભેર પ્રારંભ થયો હતો. પ્રથમ નોરતાથી જ ખેલૈયાઓ અને માતાજીના ભક્તોમાં ભારે ઉત્સાહ તથા થનગનાટ જોવા મળ્યો હતો.

વિદ્યાનગર રોડ યુવક મંડળ તથા ધ ઝવેરાતના સંયુક્ત ઉપક્રમે આયોજિત ‘ભવ્ય આદ્યશક્તિ નવરાત્રિ-2026’નો પ્રારંભ થતાં જ ગરબા ગ્રાઉન્ડમાં ભક્તિમય માહોલ છવાયો હતો. મા અંબાના જયઘોષ અને સંગીતના સૂર સાથે ખેલૈયાઓએ પરંપરાગત ગરબાની રમઝટ બોલાવી હતી.

આણંદના હાર્ટ કિલર ગરબા ગ્રાઉન્ડ ખાતે ‘હાર્ટ કિલરના હિલ્લોરે આણંદ-2026’ નવરાત્રિ મહોત્સવમાં પણ પ્રથમ નોરતાથી જ ઉત્સાહ છવાયો હતો. પ્રખ્યાત કલાકાર કાવ્યા લીંમયે અને તેમની ટીમના સૂરે ખેલૈયાઓ ગરબે ઘૂમ્યા હતા.

લાંભવેલ નજીક 13 એકરના વિશાળ વિસ્તારમાં આવેલા ‘માં શક્તિ ગરબા ગ્રાઉન્ડ’ ખાતે થીમ આધારિત ભવ્ય રોશની અને આકર્ષક ડેકોરેશન મુખ્ય આકર્ષણ બન્યાં હતાં. ગરબા ક્વિન પ્રાપ્તિ મહેતાના સુરીલા અવાજે ખેલૈયાઓને ગરબે ઝૂમવા પ્રેર્યા હતા. તેમણે ચરોતર સહિત ગુજરાતભરના ગરબા પ્રેમીઓને આ મહોત્સવમાં જોડાવા આમંત્રણ પાઠવ્યું હતું.

દરમિયાન, ચરોતર એજ્યુકેશન સોસાયટી દ્વારા ડી.એન. હાઈસ્કૂલના પ્રાંગણમાં આયોજિત ‘આદ્યશક્તિ મહારુદ્ર (મહાકાળી) નવરાત્રિ મહોત્સવ-2026’નો પણ ભવ્ય પ્રારંભ થયો હતો. મા જગદંબાની પૂજા-અર્ચના અને આરતી સાથે સમગ્ર પરિસર ભક્તિના રંગે રંગાયું હતું.

ચારેય ગરબા ગ્રાઉન્ડ ખાતે ઉપસ્થિત મહાનુભાવોએ માતાજીની આરતી ઉતારી સૌના જીવનમાં સુખ, શાંતિ, સમૃદ્ધિ અને સુખાકારી જળવાઈ રહે તેવી પ્રાર્થના કરી હતી. આમ, નવરાત્રિના પ્રથમ નોરતાથી જ આણંદમાં પરંપરા, સંસ્કૃતિ અને આધુનિક આયોજનનો અનોખો સંગમ જોવા મળ્યો હતો.

સંગીતના સૂરે ખેલૈયાઓમાં ઉત્સાહ

આણંદના હાર્ટ કિલર ગરબા ગ્રાઉન્ડ ખાતે કાવ્યા લીંમયે અને લાંભવેલ નજીક ‘માં શક્તિ ગરબા ગ્રાઉન્ડ’ ખાતે પ્રાપ્તિ મહેતા તેમજ વિદ્યાનગર રોડ યુવક મંડળ ગ્રાઉન્ડ આણંદ અને ડી.એન. હાઈસ્કૂલના પ્રાંગણમાં ગરબા ગાયકોના ના સુરીલા અવાજ સાથે આ ચારેય ગરબા ગ્રાઉન્ડ પર પ્રથમ નોરતાથી જ ખેલૈયાઓએ પરંપરાગત ગરબાની રમઝટ બોલાવી હતી. ભવ્ય લાઇટિંગ અને આકર્ષક ડેકોરેશને ઉત્સવની રોનક વધારી હતી.

ભક્તિ અને સંગીતનો અનોખો સંગમ

આણંદના ચારેય ગરબા ગ્રાઉન્ડ ખાતે મા જગદંબાની આરતી અને પૂજા-અર્ચના સાથે નવરાત્રી મહોત્સવનો રંગે ચંગે પ્રારંભ થયો છે . ભક્તોએ પરિવાર અને સમાજની સુખાકારી માટે પ્રાર્થના કરી નવરાત્રિ મહોત્સવનો ભક્તિભાવપૂર્વક પ્રારંભ કર્યો હતો.આસો નવરાત્રિના પ્રથમ નોરતે જ આણંદમાં ગરબા પ્રેમીઓનો ઉત્સાહ ચરમસીમાએ જોવા મળ્યો હતો.