આણંદ માર્ગ અને મકાન વિભાગની રાજ્ય સ્તરે ઝળહળતી સિદ્ધિ

આણંદ માર્ગ અને મકાન વિભાગની રાજ્ય સ્તરે ઝળહળતી સિદ્ધિ

ગવર્નન્સ પરફોર્મન્સ ઇન્ડેક્સમાં આણંદ વિભાગે રાજ્યમાં દ્વિતીય ક્રમ પ્રાપ્ત કરી ગૌરવ વધાર્યું

ગાંધીનગર ચિંતન શિબિરમાં કાર્યપાલક ઈજનેરશ્રી હિતેષ એ. ગઢવીનું મુખ્યમંત્રીશ્રીના હસ્તે પ્રશસ્તિ પત્ર આપી બહુમાન કરાયું

આણંદ ટુડે I આણંદ,
આણંદ માર્ગ અને મકાન વિભાગ દ્વારા વહીવટી કાર્યક્ષમતા અને શ્રેષ્ઠ આંતરમાળખાકીય સુવિધાઓના નિર્માણમાં નોંધપાત્ર પ્રદર્શન બદલ રાજ્ય કક્ષાએ ગૌરવશાળી સિદ્ધિ હાંસલ કરવામાં આવી છે. 

ગાંધીનગરના મહાત્મા મંદિર ખાતે આયોજિત માર્ગ અને મકાન વિભાગની બે દિવસીય રાજ્ય સ્તરીય ‘ચિંતન શિબિર’ દરમિયાન ગુજરાતના મુખ્યમંત્રી શ્રી ભૂપેન્દ્રભાઈ પટેલના હસ્તે આણંદ વિભાગના કાર્યપાલક ઈજનેર શ્રી હિતેષ એ. ગઢવીને ગવર્નન્સ પરફોર્મન્સ ઈન્ડેક્સ (GPI) એવોર્ડ એનાયત કરી સન્માનિત કરવામાં આવ્યા હતા. આ પ્રસંગે રાજ્યના માર્ગ અને મકાન વિભાગના ઉચ્ચ અધિકારીઓની ઉપસ્થિતિમાં આણંદ જિલ્લાની આ વિશેષ સિદ્ધિની સરાહના કરવામાં આવી હતી.

આ અવસરે વિવિધ કેટેગરીમાં ઉત્કૃષ્ટ પ્રદર્શન કરનાર અધિકારીઓ અને વિભાગોને પ્રોત્સાહિત કરવા માટે એવોર્ડ એનાયત કરવામાં આવ્યા હતા. ઓગસ્ટ-૨૦૨૬ સુધીના ગવર્નન્સ પરફોર્મન્સ ઇન્ડેક્સ (GPI)ના આધારે કરવામાં આવેલા મૂલ્યાંકનમાં માર્ગો અને પુલોની શ્રેણીમાં આણંદ વિભાગે સમગ્ર રાજ્યમાં ડિવિઝન સ્તરે દ્વિતીય ક્રમ (રેન્ક-૨) પ્રાપ્ત કર્યો છે.

મુખ્યમંત્રી શ્રી ભૂપેન્દ્રભાઈ પટેલના હસ્તે સન્માન સ્વીકારતા કાર્યપાલક ઈજનેર હિતેષ એ. ગઢવીએ આ સફળતાનો શ્રેય આણંદ માર્ગ અને મકાન વિભાગની સમગ્ર ટીમને આપ્યો હતો. ગતિ, ગુણવત્તા અને ગૌરવના સૂત્ર સાથે કરવામાં આવેલી આ કામગીરીને કારણે આણંદ જિલ્લામાં માર્ગ નિર્માણ અને જાળવણીના ક્ષેત્રે નવી ઊંચાઈઓ સર થઈ છે. આ પુરસ્કાર માત્ર એક વ્યક્તિગત સિદ્ધિ નથી, પરંતુ સમગ્ર ડિવિઝનના અધિકારીઓ અને કર્મચારીઓની સંયુક્ત મહેનત અને લોકસેવા પ્રત્યેની તેમની પ્રતિબદ્ધતાનું પરિણામ છે તેમ જણાવ્યું હતું.

શ્રી ગઢવી એ વધુમાં કહ્યું કે રાજ્ય સ્તરે મળેલી આ વિશિષ્ટ ઓળખ આણંદ માર્ગ અને મકાન વિભાગ માટે ભવિષ્યમાં વધુ ઊર્જા સાથે કામ કરવા માટે પ્રેરણારૂપ બનશે. ગવર્નન્સ પરફોર્મન્સ ઈન્ડેક્સમાં દ્વિતીય સ્થાન મેળવવું એ બાબત સ્પષ્ટ કરે છે કે આણંદ વિભાગ દ્વારા સરકારી યોજનાઓનું અમલીકરણ અને માળખાગત સુવિધાઓનું નિર્માણ અત્યંત અસરકારક રીતે કરવામાં આવી રહ્યું છે. આ સિદ્ધિ બદલ આણંદ જિલ્લા કલેકટર શ્રી પ્રવીણ ચૌધરી અને જિલ્લાના અધિકારીઓએ પણ માર્ગ અને મકાન વિભાગની ટીમને અભિનંદન પાઠવ્યા હતા.
*****