એસ.એસ. હોસ્પિટલ, પેટલાદના કુશળ નેત્રસર્જન ડૉ. યોગેશ પરમારનું રાજ્યકક્ષાએ ભવ્ય બહુમાન કરાયું

એસ.એસ. હોસ્પિટલ, પેટલાદના કુશળ નેત્રસર્જન ડૉ. યોગેશ પરમારનું રાજ્યકક્ષાએ ભવ્ય બહુમાન કરાયું

સર્વશ્રેષ્ઠ અને ઉત્કૃષ્ટ મોતિયાની કામગીરી બદલ સમગ્ર ગુજરાત રાજ્યમાં બીજો નંબર મેળવી આણંદ જિલ્લાનું નામ રોશન કર્યું

વર્ષ દરમિયાન ૧,૬૧૯ મોતિયાના સફળ ઓપરેશન તેમજ ૨૬૨ જેટલી માઇનોર સર્જરી પૂર્ણ કરીને સમગ્ર રાજ્યમાં બીજો નંબર પ્રાપ્ત કરવાનો ગૌરવવંતો રેકોર્ડ બનાવ્યો

આણંદ ટુડે | આણંદ,

એસ.એસ. (શ્રી સયાજી) હોસ્પિટલ, પેટલાદ ખાતે ફરજ બજાવતા નેત્રસર્જન વર્ગ-૧ ડૉ. યોગેશ પરમાર દ્વારા આંખની સર્જરી અને દર્દી સેવામાં દાખવવામાં આવેલી ઉત્કૃષ્ટ કામગીરીને બિરદાવતા રાજ્યકક્ષાએ તેમનું સન્માન કરવામાં આવ્યું છે. 

તાજેતરમાં વિશ્વ દ્રષ્ટિ દિવસ નિમિત્તે અમદાવાદ સ્થિત સિવિલ હોસ્પિટલ કમ્પાઉન્ડમાં પ્રેરણા કલશ (૧૨૦૦-બેડ હોસ્પિટલ) ખાતે રાજ્ય સરકાર દ્વારા વિશેષ સત્કાર સમારંભનું આયોજન કરવામાં આવ્યું હતું. જેમાં રાજ્યકક્ષાના શહેરી વિકાસ અને શહેરી ગૃહ નિર્માણ મંત્રીશ્રી શ્રીમતી દર્શનાબેન વાઘેલાની પ્રેરક ઉપસ્થિતિમાં ડૉ. યોગેશ પરમારને સન્માનપત્ર અને મોમેન્ટો આપીને બહુમાનિત કરવામાં આવ્યા હતા. 

વર્ષ ૨૦૨૫-૨૬ દરમિયાન ડૉ. યોગેશ પરમાર દ્વારા સમગ્ર રાજ્યમાં મોતિયા અને અન્ય નેત્ર સર્જરી ક્ષેત્રે શ્રેષ્ઠ કામગીરી કરવામાં આવી હતી. તેઓએ વર્ષ દરમિયાન ૧,૬૧૯ મોતિયાના સફળ ઓપરેશન તેમજ ૨૬૨ જેટલી માઇનોર સર્જરી પૂર્ણ કરીને સમગ્ર રાજ્યમાં બીજો નંબર પ્રાપ્ત કરવાનો ગૌરવવંતો રેકોર્ડ બનાવ્યો છે. 

ઉલ્લેખનીય છે કે, આ પૂર્વે ૨૬ જાન્યુઆરી-૨૦૨૬ના કલેક્ટરશ્રી, આણંદ દ્વારા પણ તેમની સેવાઓને બિરદાવી સન્માનપત્ર એનાયત કરવામાં આવ્યું હતું. 

એસ.એસ. હોસ્પિટલ, પેટલાદનો આંખ વિભાગ વિસ્તારના નાગરિકો માટે આશીર્વાદરૂપ સાબિત થઈ રહ્યો છે. આ વિભાગમાં નિષ્ણાત ડોક્ટરો દ્વારા ઉચ્ચ કક્ષાની સંપૂર્ણ નિઃશુલ્ક સારવાર પૂરી પાડવામાં આવે છે. વર્ષ ૨૦૨૫-૨૬ દરમિયાન આંખ વિભાગની ઓ.પી.ડી.માં કુલ ૧૯,૯૫૦ દર્દીઓએ નિદાન અને સારવારનો લાભ લીધો હતો. ચાલુ વર્ષ એપ્રિલ થી સપ્ટેમ્બર-૨૦૨૬ સુધીમાં કુલ ૮,૧૦૦ દર્દીઓએ સારવાર મેળવી છે, જેમાં ૧,૦૧૧ મેજર અને ૧૪૧ માઇનોર સર્જરી નોંધાઈ છે. 

આ સફળતા અને રાજ્યકક્ષાના સન્માન બદલ હર્ષ વ્યક્ત કરતા ડૉ. યોગેશ પરમારે જણાવ્યું હતું કે, આ સિદ્ધિ હોસ્પિટલના તમામ ઉચ્ચ અધિકારીશ્રીઓ, સાથી કર્મચારીશ્રીઓ અને નર્સિંગ સ્ટાફના અવિરત સહયોગ અને સમર્પણ ભાવ વિના શક્ય નહોતી. 

એસ.એસ.હોસ્પિટલ પેટલાદના સિવિલ સર્જન ડોક્ટર કાપડિય એ ડોક્ટર યોગેશ પરમાર ને સમગ્ર સ્ટાફ વતી અભિનંદન પાઠવ્યા હતા. 

આ તકે ડોક્ટર યોગેશ પરમારે સમગ્ર હોસ્પિટલ પરિવારનો હૃદયપૂર્વક આભાર વ્યક્ત કર્યો હતો.  

*****