શાળાના શિક્ષિકા જ બન્યાં પ્રેરણાદાયી દાતા

શિક્ષણના સથવારે....

શાળાના શિક્ષિકા જ બન્યાં પ્રેરણાદાયી દાતા..

શાળાના શિક્ષિકા અને દાતાઓના સહયોગથી કરજણ-૧ શાળાના બાળકોના ચહેરા પર ખીલ્યું સ્મિત

દાતા દક્ષાબેન લાલજીભાઈ પટેલ (શિક્ષિકા )ના આર્થિક સહયોગથી બાળકોને પુસ્તક અને લેખન સામગ્રી ભેટ

આણંદ ટુડે | કરજણ
વડોદરા જિલ્લાના કરજણ-૧ પ્રાથમિક શાળાના ૪૫૦ વિદ્યાર્થીઓને શાળાના આદર્શ શિક્ષિકા અને પ્રેરણાદાયી દાતા દક્ષાબેન લાલજીભાઈ પટેલ તેમજ અન્ય દાતા તરફથી શૈક્ષણિક કીટનો વિશેષ લાભ મળ્યો હતો. બાળકોના શિક્ષણ પ્રત્યેની લાગણી અને જવાબદારીને હંમેશાં પ્રાથમિકતા આપતાં દક્ષાબેન વર્ષોથી દર વર્ષે બાળકો માટે શૈક્ષણિક કીટની અવિરત વ્યવસ્થા કરી રહ્યા છે.

વર્ષોથી ચાલતી અવિરત સેવા

કરજણ-૧ પ્રાથમિક શાળામાં વિદ્યાર્થીઓની સંખ્યા વધુ હોવાથી દર વર્ષે મોટી સંખ્યામાં શૈક્ષણિક કીટની વ્યવસ્થા કરવી પડકારજનક બને છે. પરંતુ, દક્ષાબેન લાલજીભાઈ પટેલનો વર્ષોથી એવો સંકલ્પ રહ્યો છે કે શાળાનું કોઈ પણ બાળક શિક્ષણ સામગ્રીથી વંચિત ન રહે. આ ઉમદા ભાવના સાથે તેઓ નિયમિતપણે બાળકોને શૈક્ષણિક કીટ પૂરી પાડી રહ્યા છે.

શાળા પરિવારનો સક્રિય સહયોગ

આ ભગીરથ કાર્યને સફળ બનાવવા માટે શાળાના આચાર્યશ્રી નયનભાઈ તથા સમગ્ર શાળા પરિવારે ખૂબ જ ઉત્સાહપૂર્વક સહયોગ આપ્યો હતો. સૌના સિયારા પ્રયાસોથી તમામ ૪૫૦ બાળકો સુધી સમયસર શૈક્ષણિક સામગ્રી પહોંચાડી શકાઈ હતી, જેના માટે આચાર્યશ્રીએ દાતાનો હૃદયપૂર્વક આભાર વ્યક્ત કર્યો હતો.

બાળકોના ચહેરા પર છવાઈ ખુશી

નવી નોટબુક, બોલપેન અને પેન્સિલ હાથમાં આવતાં જ ૪૫૦ બાળકોના ચહેરા ખુશીથી ખીલી ઊઠ્યા હતા. આ કીટ માત્ર શૈક્ષણિક સામગ્રી નથી, પરંતુ તેમના અભ્યાસમાં મળેલો સહયોગ અને ઉજ્જવળ ભવિષ્ય માટેનું મહામૂલું પ્રોત્સાહન છે.

સેવાકાર્યની વિશેષ ઝાંખીઓ

લાભાર્થી વિદ્યાર્થીઓ: ૪૫૦ બાળકો
કુલ આર્થિક યોગદાન: ₹૫૧,૦၀၀ (દક્ષાબેન લાલજીભાઈ પટેલ તરફથી ₹૪૧,૦૦૦

અન્ય દાતાઓ તરફથી ( ₹૧૦,૦૦૦)
વિતરિત સામગ્રી: ૧,૦૦૦ સારી ગુણવત્તાની નોટબુક, બોલપેન અને પેન્સિલ

દાતા દક્ષાબેન લાલજીભાઈ પટેલની આ પ્રેરણાદાયી પહેલ ને સલામ છે . તેઓ કહે છે કે બાળકના હાથમાં આવેલી નોટબુક તેના સપનાં લખે છે, પેન્સિલ તેની કલ્પનાઓને આકાર આપે છે અને પેન તેના ભવિષ્યની નવી ઇમારત રચે છે.

સાચે જ કહ્યું છે “શૈક્ષણિક દાન એટલે મહાદાન” ની ભાવના સાથે કરજણ-૧ શાળામાં યોજાયેલું આ સત્કાર્ય બાળકોના આવતીકાલના ઉજ્જવળ ભવિષ્યને વધુ મજબૂત બનાવનારું સાબિત થયું છે.