ચારૂસેટ સંલગ્ન CSPIT-સિવિલ એન્જિનિયરીંગની NABL એક્રીડિટેડ કોન્ક્રિટ ટેકનોલોજી લેબોરેટરી ઉદ્યોગો અને સંશોધન માટે આશીર્વાદરૂપ

ચારૂસેટ સંલગ્ન CSPIT-સિવિલ એન્જિનિયરીંગની NABL એક્રીડિટેડ કોન્ક્રિટ ટેકનોલોજી લેબોરેટરી ઉદ્યોગો અને સંશોધન માટે આશીર્વાદરૂપ

21 પરિમાણોના ટેસ્ટિંગ માટે સત્તાવાર મંજૂરી • વિદ્યાર્થીઓને રિસર્ચ સાથે ઇન્ડસ્ટ્રી લેવલ ટ્રેનિંગનો લાભ 

બિલ્ડીંગ મટીરીયલ અને કોન્ક્રિટ ટેસ્ટિંગ માટે આધુનિક સુવિધા ઉપલબ્ધ

આણંદ ટુડે | ચાંગા

શિક્ષણ ક્ષેત્રે અગ્રેસર ચરોતર યુનિવર્સિટી ઓફ સાયન્સ એન્ડ ટેકનોલોજી (CHARUSAT) સંલગ્ન ચંદુભાઈ એસ. પટેલ ઇન્સ્ટિટ્યૂટ ઓફ ટેકનોલોજી (CSPIT) ના એમ. એસ. પટેલ સિવિલ એન્જિનિયરિંગ વિભાગની કોન્ક્રિટ ટેકનોલોજી લેબોરેટરીને નેશનલ એક્રેડિટેશન બોર્ડ ફોર ટેસ્ટિંગ એન્ડ કેલિબ્રેશન લેબોરેટરીઝ (NABL) દ્વારા માન્યતા પ્રમાણપત્ર એનાયત કરવામાં આવ્યું છે.

ઉદ્યોગો અને સંશોધન માટે આશીર્વાદરૂપ આ અત્યાધુનિક લેબોરેટરીમાં બિલ્ડીંગ મટીરીયલ તેમજ ફ્રેશ અને હાર્ડન્ડ કોન્ક્રિટના ગુણાત્મક અને જથ્થાત્મક પરીક્ષણો કરવા માટે ખાસ તૈયાર કરવામાં આવી છે. ઉદ્યોગોની બદલાતી જતી જરૂરિયાતો અને કોન્ક્રિટ ડિઝાઈન ક્ષેત્રે થઈ રહેલા અદ્યતન સંશોધનોને ધ્યાનમાં રાખીને આ લેબનું નિર્માણ કરવામાં આવ્યું છે. આ સુવિધાથી માત્ર વિદ્યાર્થીઓને જ નહીં, પરંતુ બાંધકામ ઉદ્યોગ અને સરકારી પ્રોજેક્ટ્સને પણ ગુણવત્તાયુક્ત ટેસ્ટિંગ માટે સ્થાનિક સ્તરે મોટું પ્લેટફોર્મ મળે છે.

અહીં એક્સ્ટર્નલ એજન્સી જેવી કે ડેવલપર, કોન્ટ્રાક્ટર, આર્કીટેકચર, ગવર્નમેન્ટ એજન્સી, રોડ એન્ડ બિલ્ડીંગ ડીપાર્ટમેન્ટ, નગરપાલિકા વગેરેના સેમ્પલનું ટેસ્ટીંગ કરવામાં આવે છે. આ લેબમાં બ્રિક, કોન્ક્રીટ, સિમેન્ટ, એગ્રીગેટ ટેસ્ટીંગ થાય છે. આ માન્યતા અંતર્ગત લેબોરેટરીને કુલ 21 વિવિધ પરિમાણો (Parameters)ના ટેસ્ટિંગ માટે સત્તાવાર મંજૂરી મળી છે.

આ લેબમાં બી. ટેક., માસ્ટર્સ અને પીએચડી વિદ્યાર્થીઓ એક્સપરીમેન્ટ વર્ક અને રિસર્ચ વર્ક કરે છે. આ વિદ્યાર્થીઓને NABL લેબ કઈ રીતે બનાવવી તેની ટ્રેનીંગ પણ આપવામાં આવે છે. આથી લેબ ટેકનીશીયન અને ટીચિંગ સ્ટાફ ઇન્ડસ્ટ્રીમાં શું ચાલે છે તે વિશે નિયમિત અપડેટ રહે છે.