ચૂંટણી પ્રક્રિયા અને સરકારી યોજનાઓના ઉત્કૃષ્ટ પ્રચાર-પ્રસાર બદલ આણંદ માહિતી કચેરીના નાયબ કાર્યપાલક ઇજનેરશ્રી સુશીલ ક્રિશ્વિયનનું મંત્રીશ્રી સંજયસિંહ મહીડાના હસ્તે સન્માન કરાયું

ચૂંટણી પ્રક્રિયા અને સરકારી યોજનાઓના ઉત્કૃષ્ટ પ્રચાર-પ્રસાર બદલ

આણંદ માહિતી કચેરીના નાયબ કાર્યપાલક ઇજનેરશ્રી સુશીલ ક્રિશ્વિયનનું મંત્રીશ્રી સંજયસિંહ મહીડાના હસ્તે સન્માન કરાયું

૮૦મા સ્વાતંત્ર્ય પર્વની આણંદ જિલ્લાકક્ષાની ઉમરેઠ ખાતે ભવ્ય ઉજવણી

આણંદ,

૮૦મા સ્વાતંત્ર્ય પર્વની આણંદ જિલ્લા કક્ષાની ઉજવણી ઉમરેઠ ખાતે ભારે હર્ષોલ્લાસ અને દેશભક્તિના માહોલમાં યોજાઈ હતી. આ ગૌરવપૂર્ણ પ્રસંગે જિલ્લા પ્રશાસન તરફથી વિવિધ ક્ષેત્રે ઉત્કૃષ્ટ સેવાઓ આપનાર અધિકારીઓ અને કર્મચારીઓનું સન્માન કરવામાં આવ્યું હતું.

   આ રાષ્ટ્રીય સમારોહમાં ઉમરેઠ વિધાનસભા પેટા ચૂંટણી-૨૦૨૬ દરમિયાન મદદનીશ નોડલ અધિકારી તરીકે નિષ્ઠાપૂર્વકની ફરજ બજાવવા બદલ તથા વિવિધ સરકારી યોજનાઓના પ્રચાર પ્રસાર અને મીડિયા અને જિલ્લા વહીવટી તંત્ર સાથે શ્રેષ્ઠ સંકલન બદલ આણંદ જિલ્લા માહિતી કચેરીના નાયબ કાર્યપાલક ઇજનેર શ્રી સુશીલ એમ. ક્રિશ્વિયનને મંત્રીશ્રી સંજયસિંહ મહીડાના વરદ હસ્તે પ્રશસ્તિપત્ર (સન્માનપત્ર) આપી વિશેષ સન્માનિત કરવામાં આવ્યા હતા.

  શ્રી સુશીલ ક્રિશ્વિયન દ્વારા કરમસદ-આણંદ મહાનગરપાલિકા, જિલ્લાની વિવિધ નગરપાલિકાઓ તેમજ જિલ્લા અને તાલુકા પંચાયતની સામાન્ય/પેટા ચૂંટણીઓ સંદર્ભે મહત્વપૂર્ણ ચૂંટણીલક્ષી બેઠકો, મતદાર જાગૃતિ અભિયાન (SVEEP), મતદાન પ્રક્રિયા તેમજ મતગણતરી સહિતની તમામ બાબતોનું પ્રચાર-પ્રસારનું સુચારૂ સંચાલન કરવામાં આવ્યું હતું. આ ઉપરાંત, સરકારશ્રીની પ્રજાલક્ષી કલ્યાણકારી યોજનાઓ છેવાડાના માનવી સુધી પહોંચે તે માટે માહિતી કચેરીના માધ્યમથી સઘન પ્રચાર-પ્રસારની ઉમદા કામગીરી કરવા બદલ જિલ્લા વહીવટીતંત્ર દ્વારા તેમની ઉત્કૃષ્ટ સેવાની નોંધ લઈ સન્માનપત્ર એનાયત કરાયું હતું.

    આ પ્રસંગે સાંસદ શ્રી મિતેશભાઈ પટેલ, ઉમરેઠના ધારાસભ્ય શ્રી હર્ષદભાઈ પરમાર, જિલ્લા કલેકટરશ્રી પ્રવીણ ચૌધરી, જિલ્લા વિકાસ અધિકારી સુશ્રી દેવાહુતી, જિલ્લા પોલીસ અધિક્ષકશ્રી ગૌરવ જસાણી, જિલ્લા અગ્રણી શ્રી સંજયભાઈ પટેલ અને શ્રી લાલસિંહ વડોદિયા, નાયબ વન સંરક્ષકશ્રી સુરેશ મીણા, નિવાસી અધિક કલેકટરશ્રી રાહુલ ગમારા સહિત જિલ્લાના વરિષ્ઠ અધિકારીઓ, પદાધિકારીઓ, મહાનુભાવો તેમજ મોટી સંખ્યામાં નગરજનો ઉપસ્થિત રહ્યા હતા.

*****