આણંદ ખાતે અમૂલ ડેરી અને આરડાની વાર્ષિક સાધારણ સભા યોજાઈ

આણંદ ખાતે અમૂલ ડેરી અને આરડાની વાર્ષિક સાધારણ સભા યોજાઈ

₹14,099 કરોડ ટર્નઓવર, દૂધ ઉત્પાદકોના હિતમાં ઐતિહાસિક સિદ્ધિઓ અને ભવિષ્યની દ્રષ્ટિ રજૂ

આણંદ 

ખેડા જિલ્લા સહકારી દૂધ ઉત્પાદક સંઘ (અમૂલ ડેરી) ની ૭૯મી તથા અમૂલ રિસર્ચ એન્ડ ડેવલપમેન્ટ એસોસિએશન (ARDA) ની ૫૦મી વાર્ષિક સાધારણ સભા તારીખ ૧૭ જાન્યુઆરી ૨૦૨૬ ના રોજ સરદાર પટેલ સભાગૃહ, અમૂલ ડેરી, આણંદ ખાતે ચેરમેન શ્રી સાભેસિંહ પરમારના અધ્યક્ષસ્થાને યોજાઈ હતી. સહકારી ક્ષેત્રના નેતાઓ, જનપ્રતિનિધિઓ અને દૂધ મંડળીઓના પ્રતિનિધિઓની વિશાળ હાજરીમાં સંઘની નોંધપાત્ર પ્રગતિ રજૂ કરવામાં આવી હતી .

સભામાં મુખ્ય અતિથિ તરીકે માનનીય કેબિનેટ મંત્રી શ્રી રમણભાઈ સોલકી અને અતિથિ વિશેષ તરીકે આણંદના સાંસદ શ્રી મીતેષભાઈ પટેલ, ખેડાના સાંસદ શ્રી દેવુસિંહ ચૌહાણ તથા પંચમહાલના સાંસદ શ્રી રાજપાલસિંહ જાદવ ઉપસ્થિત રહ્યા હતા. ઉપરાંત આણંદ, ખંભાત, માતર અને ઠાસરાના ધારાસભ્યો, ખેડા ડિસ્ટ્રિક્ટ સેન્ટ્રલ કો-ઓપ. બેંકના ચેરમેન તથા અમૂલ ફેડરેશનના મેનેજિંગ ડિરેક્ટર ડૉ. જયેન મહેતા સહિતના મહાનુભાવો હાજર રહ્યા હતા. આરંભે અમૂલ ડેરીના વાઇસ ચેરમેન શ્રી વિજયકુમાર પટેલે સૌનું સ્વાગત કર્યું હતું.

ચેરમેન શ્રી સાભેસિંહ પરમારે સંબોધનમાં જણાવ્યું કે માત્ર ₹100ની શેર મૂડીથી શરૂ થયેલી અમૂલ ડેરી આજે ₹14,099 કરોડના ઐતિહાસિક ટર્નઓવર સુધી પહોંચી છે, જે ગત વર્ષની તુલનામાં 9.20% વૃદ્ધિ દર્શાવે છે. આજે 7 લાખથી વધુ દૂધ ઉત્પાદકો સંઘ સાથે જોડાયેલા છે અને તેમાંના 4 લાખથી વધુ ઉત્પાદકો દરરોજ દૂધ પુરું પાડે છે. પ્રતિ કિલો ફેટ માટે ₹1028 જેટલી ચુકવણી કરવામાં આવી છે, જે સહકારી મૂલ્યો અને ખેડૂતોના હિતને પ્રતિબિંબિત કરે છે.

સભામાં દૂધ ઉત્પાદન, ગુણવત્તા સુધારણા, સોર્ટેડ સેક્સ સિમેન, એમ્બ્રિયો ટ્રાન્સફર ટેકનિક, પશુચિકિત્સા સેવાઓ, ડિજિટલ કાઉ બેલ્ટ, પર્યાવરણ સંરક્ષણ, સોલર એનર્જી અને રેઇન વોટર હાર્વેસ્ટિંગ જેવા ક્ષેત્રોમાં થયેલી પ્રગતિની માહિતી આપવામાં આવી. સંઘને CII Energy Management Award, Indian Dairy Association Award અને સીમેન સ્ટેશન માટે A-ગ્રેડ સર્ટિફિકેટ જેવા પ્રતિષ્ઠિત સન્માનો પ્રાપ્ત થયા હોવાનું પણ જણાવાયું. અંતે તમામ એજન્ડાઓ સર્વાનુમતે મંજૂર કરવામાં આવ્યા અને ડિરેક્ટર શ્રી રાજેશભાઈ પાઠક દ્વારા આભારવિધિ કરવામાં આવી હતી.