વિદ્યાર્થીઓને નશાના દુષ્પ્રભાવથી બચાવવા યુવાનો નશા સામે એકજૂટ

વિદ્યાર્થીઓને નશાના દુષ્પ્રભાવથી બચાવવા યુવાનો નશા સામે એકજૂટ

NSUI દ્વારા આણંદ જિલ્લામાં “ડ્રગ્સમુક્ત કેમ્પસ અભિયાન”નો શુભારંભ

વિદ્યાર્થીઓએ ડ્રગ્સમુક્તિ માટે પ્રતિજ્ઞા લીધી

આણંદ ટુડે | આણંદ
ગુજરાત રાજ્યમાં વધતા જતા ડ્રગ્સ તથા અન્ય નશીલા પદાર્થોના દુષ્પ્રભાવ સામે વિદ્યાર્થીઓને જાગૃત કરવા માટે NSUI આણંદ જિલ્લા દ્વારા “ડ્રગ્સમુક્ત કેમ્પસ અભિયાન”નો શુભારંભ કરવામાં આવ્યો હતો. અભિયાન અંતર્ગત વિદ્યાર્થીઓએ ડ્રગ્સ તથા તમામ નશીલા પદાર્થોથી દૂર રહેવાની અને પોતાના પરિવાર તેમજ મિત્રોને પણ નશાથી દૂર રાખવા સતત પ્રયત્નશીલ રહેવાની પ્રતિજ્ઞા લીધી હતી.
આ પ્રસંગે વિદ્યાર્થીઓએ કેમ્પસને સંપૂર્ણ રીતે ડ્રગ્સમુક્ત બનાવવા માટે સક્રિય ભૂમિકા ભજવવાની પ્રતિબદ્ધતા વ્યક્ત કરી હતી. કાર્યક્રમમાં પૂ. સિન્ડિકેટ મેમ્બર તથા વિદ્યાર્થી આગેવાન શ્રી અલ્પેશ પુરોહિત, ગુજરાત પ્રદેશ યુથ કોંગ્રેસના મંત્રી શ્રી વિરેન્દ્રસિંહ ચાવડા (એડવોકેટ) અને વિદ્યાર્થી આગેવાન શ્રી જીગર વાઘેલાએ જણાવ્યું હતું કે ગુજરાતને “ઉડતુ ગુજરાત” બનતું અટકાવવું દરેક જાગૃત નાગરિક અને વિદ્યાર્થીની જવાબદારી છે.
વક્તાઓએ જણાવ્યું કે યુવાનોને નશાની લતમાંથી બચાવી શિક્ષણ, સંસ્કાર અને સ્વસ્થ સમાજ તરફ દોરી જવાનો આ અભિયાનનો મુખ્ય હેતુ છે. અભિયાનને વિદ્યાર્થીઓ તરફથી વ્યાપક સમર્થન મળી રહ્યું છે અને આવનારા દિવસોમાં આણંદ જિલ્લાના વિવિધ કોલેજો તથા કેમ્પસોમાં જાગૃતિ કાર્યક્રમો યોજાશે. NSUI આણંદ જિલ્લા દ્વારા તમામ વિદ્યાર્થીઓને આ અભિયાનમાં જોડાવા અપીલ કરવામાં આવી હતી.