કરમસદ, આણંદ મનપાનું ₹1115.5 કરોડનું મેગા બજેટ જાહેર

કરમસદ,આણંદ મનપાનું ₹1115.5 કરોડનું મેગા બજેટ જાહેર

કરમસદ આણંદ મહાનગરપાલિકાના કમિશનર શ્રી મિલિંદ બાપના દ્વારા વર્ષ 2026-27 નું રૂ. 1115.05 કરોડનું બજેટ રજૂ કરાયું

મહાનગરપાલિકા વિસ્તારમાં સતત બીજા વર્ષે પણ કર અને દરમાં કોઈપણ પ્રકારનો વધારો કરવામાં આવ્યો નથી, હાલના દર યથાવત રહેશે

ગત નાણાકીય વર્ષના અંદાજ કરતા 5.66 ટકા વધુ જોગવાઈ*

આ બજેટમાં નગરજનોની પ્રાથમિક તમામ સુવિધાઓને આવરી લેવામાં આવી છે - મહાનગરપાલિકાના વહીવટદારશ્રી અને જિલ્લા કલેકટર શ્રી પ્રવીણ ચૌધરી

મહાનગરપાલિકાનું બજેટ વિકાસલક્ષી છે, નગરજનોને વધુ સુવિધાઓ પૂરી પાડવા મહાનગરપાલિકા કટિબદ્ધ - કમિશનર શ્રી મિલિંદ બાપના

આ બજેટથી કરમસદ આણંદ મહાનગરપાલિકાનો સર્વાંગી વિકાસ થશે - ધારાસભ્ય શ્રી યોગેશભાઈ પટેલ

આણંદ ટુડે | આણંદ,
કરમસદ આણંદ મહાનગરપાલિકાના કમિશનર શ્રી મિલિંદ બાપના એ આજે મહાનગરપાલિકાનું નાણાકીય વર્ષ 2026-27 માટે અંદાજિત રૂપિયા 1115.05 કરોડનું અંદાજપત્ર મહાનગરપાલિકાના વહીવટદાર શ્રી અને કલેક્ટર શ્રી પ્રવીણ ચૌધરી સમક્ષ રજૂ કર્યું હતુ.

કરમસદ આણંદ મહાનગરપાલિકાના વહીવટદારશ્રી અને જિલ્લા કલેકટર શ્રી પ્રવીણ ચૌધરીએ મહાનગરપાલિકાના રજુ કરવામાં આવેલ બજેટ પરત્વે આનંદની લાગણી વ્યક્ત કરતાં જણાવ્યું હતુ કે, આ બજેટમાં મહાનગરપાલિકા દ્વારા સતત બીજા વર્ષે પણ કોઈ કર અને દરમાં કોઈપણ પ્રકારનો વધારો કરવામાં આવ્યો નથી.

મહાનગરપાલિકાનું આ બજેટ કરમસદ-આણંદ મહાનગરપાલિકાના તમામ વિસ્તારોના સર્વાંગી વિકાસના દ્વાર ખોલશે તેમ જણાવતાં શ્રી પ્રવીણ ચૌધરીએ ઉમેર્યું હતુ કે, બજેટમાં રસ્તાઓ, ફ્લાય ઓવર બ્રીજ, ઓક્સીજન પાર્ક, ફૂડ લેબોરેટરી, કોમ્યુનિટી હોલ, સ્માર્ટ લાઈબ્રેરી, સિનિયર સિટીઝન પાર્ક, યોગા સેન્ટર તથા ઓપન જીમ, પાણીની ટાંકી, વોટર ટ્રીટમેન્ટ પ્લાન્ટ અને પાણીની પાઇપલાઇન સહિતના શહેરીજનોની સુખાકારી માટે હાથ ધરાનાર વિવિધ માળખાકિય કાર્યોનો સમાવેશ કરવામાં આવ્યો છે.

કરમસદ આણંદ મહાનગરપાલિકાના વહીવટદાર શ્રી અને કલેક્ટર શ્રી પ્રવીણ ચૌધરીએ મહાનગરપાલિકા વિસ્તારમાં રહેતા તમામ નગરજનોની લાગણી માંગણીઓ સંતોષનારૂ આ બજેટ કમિશનર શ્રી દ્વારા રજુ કરવામાં આવ્યું છે, તેમ જણાવી મહાનગરપાલિકાના આ અંદાજપત્રનું સંપૂર્ણ અમલીકરણ થાય તે રીતે કામ કરવા જણાવ્યું હતું. તેમણે વધુમાં જણાવ્યું કે આ બજેટ ખૂબ જ ઊંડાણપૂર્વક અભ્યાસ કરીને બનાવવામાં આવ્યું છે, જેમાં પાણી, ગટર, રસ્તાનું કામ તથા લોકોની અપેક્ષાઓ હોય છે તે તમામ સુવિધાઓ આવરી લેવામાં આવી છે. આ ઉપરાંત ટેક્સમાં કોઈ પણ પ્રકારનો વધારો કરવામાં આવ્યો નથી, જે બાબતે કમિશનરશ્રીને વહીવટદારશ્રીએ અભિનંદન અને શુભેચ્છા પણ પાઠવી હતી.

આણંદના ધારાસભ્ય શ્રી યોગેશભાઈ પટેલે કરમસદ આણંદ મહાનગરપાલિકાના આ બજેટમાં આણંદના જન પ્રતિનિધિઓની માંગણી સંતોષવામાં આવી છે, જે આવકારવા દાયક બાબત છે, ઉપરાંત મહાનગરપાલિકામાં સમાવિષ્ટ ૦૪ ગ્રામ્ય વિસ્તારો  માટેના વિકાસની તમામ બાબતો આવરી લીધેલ હોય જેના કારણે રાજ્યના મોટા મહાનગરોના વિકાસની જેમ મહાનગરપાલિકાનો પણ ઝડપી વિકાસ થશે તેવું બજેટ રજૂ કર્યું છે, તેમ જણાવી આ બજેટ આવકારવા દાયક બજેટ છે અને નગરજનોને ખૂબ સુવિધા ઉપલબ્ધ બનશે અને મહાનગર માટે સર્વાંગી વિકાસ થાય તેવું બજેટ છે, તેમ જણાવી મહાનગરપાલિકાના કમિશનર શ્રી મિલિંદ બાપના અને મહાનગરપાલિકાના વહીવટદાર શ્રી અને કલેક્ટર શ્રી પ્રવીણ ચૌધરીને આ બજેટ માટે અભિનંદન પણ આપું છું, તેમ તેમણે જણાવ્યું હતું.

આ બજેટ રજુ કરતાં કરમસદ-આણંદ મહાનગરપાલિકાના કમિશનર શ્રી મિલિંદ બાપનાએ જણાવ્યું હતુ કે, મહાનગરપાલિકાનું બજેટ વિકાસલક્ષી છે, શહેરીજનોની સુખાકારી માટેની તમામ બાબતોને ધ્યાને લઈ આ બજેટ બનાવવામાં આવ્યુ છે, નગરજનોને વધુ સુવિધાઓ પૂરી પાડવા મહાનગરપાલિકા કટિબદ્ધ છે.

આ પ્રસંગે આણંદ મહાનગરપાલિકાના નાયબ મ્યુનિસિપલ કમિશનર સર્વ શ્રી નિલાક્ષ મકવાણા અને શ્રી એસ. કે. ગરવાલ સહિત મહાનગરપાલિકાના અધિકારી, કર્મચારીઓ ઉપસ્થિત રહ્યા હતા.

મનપાના બજેટમાં વિકાસનો મહાપ્લાન,શહેરમાં ફ્લાયઓવરથી ક્રિકેટ સ્ટેડિયમ સુધી અનેક પ્રોજેક્ટ

 મહાનગરપાલિકાના મુખ્ય રસ્તાઓ જેવા કે, શહીદ ચોક થી આર્કિટેક્ચર કોલેજ સુધીનો રોડ અને આત્મીય વિદ્યા ધામ થી જલાવાટિકા સોસાયટીનો રોડ આર.સી.સી.રોડ બનાવવામાં આવશે.

 મહાનગરપાલિકા વિસ્તારમાં આવેલ 03 રોડ કરમસદ વિદ્યાનગર રોડ, એ.પી.સી સર્કલ થી ગીતા સર્કલ, વિવાહ પાર્ટી પ્લોટ થી રામદેવપીર મંદિર સુધીનો રોડને વાઈટ ટોપીંગ રોડ તરીકે ડેવલોપ કરવામાં આવશે.

 શહેરના વધતાં જતાં વિસ્તાર અને ટ્રાફિકને ધ્યાને રાખી ચિખોદરા ચોકડી થી વલાસણ ગામની હદ સુધીના રોડને ગ્રીન રીંગ રોડ તરીકે ડેવલોપ કરવામાં આવશે.

 આગામી સમયમાં મુખ્ય માર્ગોની બાજુમાં પડતર ઓપન સ્પેસમાં નગરજનો માટે વોકવે ડેવલોપમેન્ટ તથા બ્યુટીફીકેશન કરવામાં આવશે.

 આગામી સમયમાં શહેરના તથા ગ્રામ્ય વિસ્તારમાં આવેલ મુખ્ય માર્ગોને જરૂરિયાત મુજબ આર.સી.સી.રોડ તથા ડામર રોડ બનાવવામાં આવશે.

 શહેરના દિન પ્રતિ દિન વધતાં જતાં ટ્રાફિક તથા પરિવહનને ધ્યાને રાખી શહેરના મુખ્ય રસ્તાઓ પર આવેલ (૦૯) નવ જંકશનો પર પ્રાયોગિક ધોરણે મહાનગરપાલિકા દ્વારા ટ્રાફિક કંટ્રોલ સિસ્ટમનું નિર્માણ કરવામાં આવશે.

 મહાનગરપાલિકા વિસ્તારના લાંભવેલ હનુમાન મંદિરથી રાવળાપુરા તરફ જતાં રોડને લિક્ર રોડ તરીકે ડેવલોપ કરવામાં આવશે.

 સરદાર પટેલ રાજ માર્ગના બાકી રહેલ રોડને આઈકોનિક રોડ તરીકે ડેવલોપ કરવામાં આવશે તથા શહેરના મુખ્ય માર્ગ ૧૦૦ ફૂટ અને ૮૦ ફૂટ રોડને ડસ્ટ ફ્રી રોડ તરીકે ડેવલોપ કરવામાં આવશે.

 મહાનગરપાલિકા વિસ્તારમાં આણંદ વિધાનગર રોડ પર આંતરરાષ્ટ્રીય કક્ષાનું નવીન સરદાર પટેલ ઇન્ટરનેશનલ કન્વેન્શન સેન્ટરનું નિર્માણ કરવામાં આવશે.

 આણંદ શહેરમાં ટ્રાફિક થી ધમ-ધમતાં અટલ ચોક તથા APC સર્કલ નવીન ફલાય ઓવર બ્રીજનું નિર્માણ કરવામાં આવશે.

 ગીતા સર્કલ થી યોગી સર્કલ નવીન ફલાયઓવર બનાવવાનું આયોજન કરવામાં આવ્યું છે.

 મહાનગરપાલિકાનું દિન પ્રતિ દિન વધતાં વિસ્તાર તથા વ્યાપને ધ્યાને રાખી નવી લેન્ડ ફિલ સાઇટનું નિર્માણ કરવામાં આવશે.

 મહાનગરપાલિકા વિસ્તારમાં નવીન (૦૧) એક સ્મશાન ગૃહનું નિર્માણ કરવામાં આવશે તથા હયાત કૈલાશભૂમિને અદ્યતન બનાવી તથા એક્સટેન્શન કરવામાં આવશે.શહેરના નગરજનોની સુખાકારી માટે નવીન યોગા સેન્ટર નિર્માણ કરવામાં આવશે.

 મહાનગરપાલિકા વિસ્તારમાં સુવિધાથી સજ્જ નવીન એક લાયબ્રેરીનું નિર્માણ કરવામાં આવશે.

 શહેરના નગરજનોને ટેક્સની ભરપાઈ, જન્મ મરણ તથા લગ્ન નોંધણી, મહાનગરપાલિકાની વિવિધ સુવિધાઓનો લાભ નજીકમાં મળી રહે તે હેતુથી નવીન પાંચ વોર્ડ ઓફિસ ઉપરાંત એક ફૂડ લેબોરેટરીનું પણ નિર્માણ કરવામાં આવશે.

 મહાનગરપાલિકા વિસ્તારમાં કુતરાઓના ખસીકરણ માટે એક નવીન એનિમલ બર્થ કંટ્રોલ સેન્ટરનું નિર્માણ કરવાં આવશે.

 મહાનગરપાલિકા વિસ્તારમાં એક ક્રિકેટ સ્ટેડીયમનું નિર્માણ કરવામાં આવશે.

 ઓક્સિજન પાર્ક બનાવવાનું આયોજન કરવામાં આવ્યું છે.

 જળસંગ્રહ શક્તિ વધારવા માટે તળાવોને ઊંડા કરવા તળાવોના ફ્રન્ટ ડેવલપમેન્ટ તેમજ તળાવનું બ્યુટીફિકેશન કરવાની કામગીરી કરવામાં આવશે.

 આણંદ શહેરની મધ્યમાં આવેલ બંને ગોયા તળાવ ને મીની કાંકરિયા થીમ પર ડેવલોપ કરી પ્રવાસનનું સ્થળ બનાવવામાં આવશે.

 શહેરની મધ્યમાં એક ઇન્ટીગ્રેટેડ કમાન્ડ કંટ્રોલ સેન્ટરનું પણ નિર્માણ કરવામાં આવશે.

 નવી 20 આંગણવાડી, બે મલ્ટી લેવલ સ્માર્ટ પાર્કિંગ બનાવવાના આયોજન ઉપરાંત ગુજરાત ગૌરવ પાર્ક, આઇકોનિક થીમ પાર્ક, નવું ફિઝિયોથેરાપી સેન્ટર બનાવવાનું આયોજન,

 જન્મ મરણ સહિત લગ્નના રેકોર્ડને ડિઝિટાઇઝેશન કરવાનું આયોજન,

 મહાનગરપાલિકાના દરેક ઝોન ખાતે એક આયુષ સેન્ટરનું નિર્માણ,

 વિદ્યાનગર વિસ્તારમાં એનિમલ કરુણા સેન્ટર બનાવવાનું આયોજન,

 નાવલી વિસ્તારમાં નવી એનિમલ હોસ્ટેલ ડોગ હોસ્ટેલ બનાવવાનું આયોજન,

 નાવલી એનસીસી નગરની સામે 500 ઢોરની ક્ષમતા ધરાવતી ઢોર ડબ્બા અપગ્રેડ કરવા માટેનું આયોજન તેમજ ઢોરના રસીકરણ અને ખસીકરણ તથા મહાનગરપાલિકા વિસ્તારના પશુઓ માટે માઇક્રોચીપ લગાવવાની જોગવાઈ પણ કરવામાં આવી છે.

 અગ્નિસામક વિભાગને લગતા કામોમાં સામરખા ચોકડી પાસે નવીન ફાયર સ્ટેશન બનાવવાનું આયોજન, નવીન ફાયર સાધનો તેમજ વિવિધ મશીનરી ખરીદવાનું આયોજન, સોજીત્રા રોડ ફાયર સ્ટેશન તેમજ નવીન મોડલ ફાયર સ્ટેશનને નાની ખોડીયાર ખાતે કાર્યરત કરવાનું આયોજન હાથ ધરવામાં આવ્યું છે.

 કરમસદ આણંદ વલ્લભ વિદ્યાનગર વિસ્તારમાં 150 કિલોમીટર લંબાઇની ગટર લાઈનનું કામ, નવા પાંચ પંપીંગ સ્ટેશન બનાવવાનું કામ, ગોયા તળાવ અને લોટેશ્વર તળાવમાં બારેમાસ પાણી સંગ્રહ કરવાનું આયોજન, રાજમાર્ગ પર બોક્ષ ટાઈપ સ્ટોર્મ ડ્રેઇનની કામગીરી કરવામાં આવશે.

 નેટ ઝીરો ઉત્સર્જનના ધ્યેયને હાંસલ કરવા શાળા અને આંગણવાડી તેમજ કોર્પોરેશન હસ્તકની મિલકતોની છત ઉપર સોલાર સિસ્ટમ ફીટ કરવાનું આયોજન, ઉપરાંત 10 નવા EV ચાર્જિંગ સ્ટેશન વિકસાવવાનું આયોજન પણ કરવામાં આવ્યુ છે.

 મહાનગરપાલિકા વિસ્તારમાં સમાવિષ્ટ ચાર ગામોમાં નવી ડ્રેનેજ લાઈન, પંપીંગ સ્ટેશન બનાવવાનું અને નવી પાણીની લાઈન નાખવાનું આયોજન તથા એક કોમ્યુનિટી હોલ એટલે કે લગ્ન વાડી, એક સ્માર્ટ લાઈબ્રેરી સિનિયર સિટીઝન પાર્ક યોગા સેન્ટર તથા ઓપન જીમ, પાણીની ટાંકી, વોટર ટ્રીટમેન્ટ પ્લાન્ટ અને પાણીની પાઇપલાઇન બનાવવાનું આયોજન કરવામાં આવ્યું છે.

 મહાનગરપાલિકાના તમામ વિસ્તારોમાં સો ટકા ડોર ટુ ડોર વેસ્ટ કલેક્શન થાય તે માટે નવીન ટેકનોલોજી સાથે વધુ સારી રીતે કામ કરવાનું આયોજન કરવામાં આવ્યું છે તથા ડમ્પીંગ સાઈડ ખાતે 2.74 કરોડના ખર્ચે સીએનડી વેસ્ટ પ્રોસેસિંગ પ્લાન્ટ બનાવવામાં આવ્યો છે જેની દૈનિક ક્ષમતા 3 TPD છે. ₹23 કરોડના ખર્ચે સુકા કચરાના પ્રોસેસિંગ માટે તથા ભીના કચરાના પ્રોસેસિંગ માટે કમ્પોસ્ટ પ્લાન્ટ બનાવવામાં આવશે.

 મહાનગરપાલિકા વિસ્તારમાં ચાર નવા યોગા સેન્ટર, બે  ઓપન જિમ, એક નવો સ્વિમિંગ પૂલ અને રીક્રીએશન સેન્ટર, એક નવો ડેડીકેટેડ સાયકલ ટ્રેક, આઉટડોર ગેમ ઝોન, બે નવી લાઇબ્રેરી અને સ્ટડી સેન્ટર, શાસ્ત્રી ક્રિકેટ સ્ટેડિયમ અપગ્રેડેશનનું આયોજન, નવા ક્રિકેટ સ્ટેડિયમ બનાવવાનું આયોજન, હયાત આંગણવાળીઓને સ્માર્ટ આંગણવાડીમાં રૂપાંતરિત કરવાનું આયોજન અને બોક્સ ક્રિકેટ બનાવવાનું આયોજન કરવામાં આવ્યું છે.