આણંદમાં સિંગલ યુઝ પ્લાસ્ટિકનું વેચાણ કરતા વેપારીઓ સામે KAMC ની લાલ આંખ, રૂપિયા ૪૧ હજારનો દંડ વસુલ્યો
આણંદમાં સિંગલ યુઝ પ્લાસ્ટિકનું વેચાણ કરતા વેપારીઓ સામે KAMC ની લાલ આંખ, રૂપિયા ૪૧ હજારનો દંડ વસુલ્યો
૪૦ કિલો ઉપરાંત પ્લાસ્ટિકનો જથ્થો જપ્ત કરવામાં આવ્યો
આણંદ ટુડે | આણંદ,
કરમસદ આણંદ મહાનગરપાલિકાના કમિશનર શ્રી ના માર્ગદર્શન હેઠળ સેનિટેશન વિભાગ દ્વારા મનપા વિસ્તારના વિવિધ એકમો ખાતે સિંગલ યુઝ પ્લાસ્ટિક નું વેચાણ કરતા વેપારીઓને ત્યાં આકસ્મિક તપાસ કરવામાં આવી હતી.
કરમસદ આણંદ મહાનગરપાલિકાના સેનિટેશન વિભાગની વિધાનગર તથા કરમસદની ટીમ દ્વારા મોટા બજારમાં સિંગલ યુઝ પ્લાસ્ટિકનું વેચાણ કરતાં એકમો સાગર ડિપોઝેબલ્સ ડેકોરેશન, જિનેશ્વર પ્લાસ્ટિક એન્ડ ડિસ્પોઝેબલ અને જાગૃતિ પેકેજીંગ એન્ડ પ્રિન્ટિંગ ખાતે આકસ્મિક તપાસ હાથ ધરી હતી. આ તપાસ દરમિયાન આ એકમો પાસેથી સિંગલ યુઝ પ્લાસ્ટિક નો જથ્થો મળી આવતા ૪૦ કિલો ઉપરાંત પ્લાસ્ટિકનો જથ્થો જપ્ત કરવામાં આવ્યો છે અને તેઓની સામે દંડકીય કાર્યવાહી કરવામાં આવી છે.
મનપાની સેનિટેશન વિભાગની ટીમ દ્વારા સાગર ડિસ્પોઝેબલ્સ ડેકોરેશન પાસેથી રૂપિયા ૧૧ હજાર, જીનેશ્વર પ્લાસ્ટિક એન્ડ ડિસ્પોઝેબલ પાસેથી રૂપિયા ૧૫ હજાર અને જાગૃતિ પેકેજીંગ એન્ડ પ્રિન્ટિંગ પાસેથી રૂપિયા ૧૫ હજાર મળીને કુલ રૂપિયા ૪૧ હજારનો દંડ વસૂલ કરવામાં આવ્યો છે.
કરમસદ આણંદ મહાનગરપાલિકા વિસ્તારમાં પ્લાસ્ટિક અને ડિસ્પોઝેબલ્સ નો વેપાર કરતા એકમોને સિંગલ યુઝ પ્લાસ્ટિક નું વેચાણ ન કરવા માટે જણાવવામાં આવ્યું છે અન્યથા આવા એકમો ખાતે આકસ્મિક તપાસણી કરવામાં આવશે અને દંડનીય કાર્યવાહી કરવામાં આવશે.
***
