AnandToday

આણંદની રાષ્ટ્રપ્રેમી મહિલાઓને ફરી એકવાર ગિનિસ વર્લ્ડ રેકોર્ડ

ઉન અને અંકોડીથી 47,500 રાષ્ટ્રધ્વજ બનાવી વિશ્વ રેકોર્ડ સર્જ્યો

330 મહિલાઓની સહભાગિતાથી વિશાખાપટ્ટનમમાં 12.18 કિમી લાંબા તિરંગાનું પ્રદર્શન

આણંદ ટુડે | આણંદ
આણંદની બહુમુખી પ્રતિભાશાળી, સક્રિય અને રાષ્ટ્રપ્રેમી મહિલાઓએ ફરી એકવાર ગિનિસ વર્લ્ડ રેકોર્ડમાં સ્થાન મેળવી સમગ્ર દેશનું ગૌરવ વધાર્યું છે. ‘મહિલા માનો વિકાસ’ દ્વારા રાષ્ટ્રીય મિશન ‘હર ઘર તિરંગા’ને વેગ આપવા આયોજિત આ અભિયાનમાં શ્રીમતી માધવી સુરબટલાના માર્ગદર્શન હેઠળ શ્રીમતી સવિતા સોનક અને શ્રીમતી અંશુ માલિની સાથે આણંદની મહિલાઓએ ઉત્સાહપૂર્વક ભાગ લીધો હતો.
આ અભિયાનમાં શ્રીમતી આરતીબેન જગદીશભાઈ પટેલ, શ્રીમતી શોભાબેન અશોકભાઈ પટેલ, શ્રીમતી વિભાવરીબેન વિનોદભાઈ પટેલ, શ્રીમતી રીમાબેન ઝવેરી, નિમિષાબેન પટેલ તેમજ ડૉ. કાજલ નિર્મલા ભરત રાવ સહિતની મહિલાઓ જોડાઈ હતી.
દેશ-વિદેશની કુલ 330 મહિલાઓએ ઉન અને અંકોડીની મદદથી 47,500 રાષ્ટ્રધ્વજ તૈયાર કર્યા હતા. વિશાખાપટ્ટનમના સ્ટેડિયમ ખાતે સાત દિવસ સુધી આ રાષ્ટ્રધ્વજનું પ્રદર્શન યોજાયું હતું. આ દરમિયાન 12.18 કિલોમીટર સુધી રાષ્ટ્રધ્વજ લહેરાવવામાં આવ્યા હતા.
મહિલાઓની સતત મહેનત, ખંત, નિષ્ઠા અને રાષ્ટ્રપ્રેમની નોંધ લેતા તેમને ‘લાઈફટાઈમ એચીવમેન્ટ’ ગિનિસ વર્લ્ડ રેકોર્ડ વ્યક્તિગત રીતે એનાયત કરવામાં આવ્યો છે. આ સિદ્ધિ આણંદ સહિત સમગ્ર ગુજરાત અને દેશ માટે ગૌરવની બાબત બની છે.