AnandToday

કરજણ-૧ પ્રાથમિક શાળાની આદર્શ શિક્ષિકા દક્ષાબેન પટેલનું રાષ્ટ્રપિતા મહાત્મા ગાંધી નેશનલ એજ્યુકેશન ગ્લોરી એવોર્ડ’થી સન્માન

શિક્ષણ, બાળ સાહિત્ય અને સમાજસેવામાં ઉત્કૃષ્ટ કામગીરી બદલ સન્માન

આણંદ ટુડે | કરજણ
કરજણ-૧ પ્રાથમિક શાળાની આદર્શ શિક્ષિકા, ઇનોવેટિવ ટીચર અને બાળ સાહિત્યકાર દક્ષાબેન લાલજીભાઈ પટેલને શિક્ષણ ક્ષેત્રે ઉત્કૃષ્ટ કામગીરી બદલ રાષ્ટ્રપિતા મહાત્મા ગાંધી નેશનલ એજ્યુકેશન ગ્લોરી એવોર્ડ’થી સન્માનિત કરવામાં આવ્યા હતા.
બાલરક્ષક પ્રતિષ્ઠાન દ્વારા આણંદના ભાનુભાઈ આઈ. પટેલ એલિકોન હોલ ખાતે આયોજિત સમારોહમાં શિક્ષણ ક્ષેત્રે નોંધપાત્ર કામગીરી કરનાર શ્રેષ્ઠ શિક્ષકોનું સન્માન કરવામાં આવ્યું હતું. ઉપસ્થિત મહાનુભાવોના હસ્તે દક્ષાબેન પટેલને એવોર્ડ, ટ્રોફી તથા સન્માનપત્ર અર્પણ કરાયા હતા.
દક્ષાબેન પટેલ શિક્ષણ કાર્યની સાથે બાળ સાહિત્ય સર્જન અને સર્જનાત્મક લેખન દ્વારા બાળકોમાં વાંચન તથા સર્જનાત્મકતાના વિકાસ માટે કાર્યરત છે. ઇનોવેટિવ ટીચર તરીકે તેઓ નવીન શૈક્ષણિક પ્રવૃત્તિઓ દ્વારા બાળકોના પાયાના શિક્ષણને મજબૂત બનાવવા સતત પ્રયત્નશીલ છે. ઉપરાંત સ્ત્રી સશક્તિકરણ, સમાજસેવા, રાષ્ટ્રસેવા, પ્રકૃતિ સંરક્ષણ અને જીવદયા ક્ષેત્રે પણ તેમની નોંધપાત્ર કામગીરી રહી છે.
સમારોહમાં પ્રો. (ડૉ.) ભરત મહેતા, ડૉ. નિશા જોશી, મોરારિદાસજી મહારાજ, આર. કે. મંડાલીયા, પ્રો. (ડૉ.) મેઘના વ્યાસ, DEO કામિનીબેન ત્રિવેદી, નાયબ DPEO ડૉ. તેજેન્દ્રસિંહ સહિતના મહાનુભાવો ઉપસ્થિત રહ્યા હતા. દક્ષાબેન પટેલને મળેલા સન્માન બદલ શાળા પરિવાર તથા શિક્ષણ આલમ દ્વારા અભિનંદન પાઠવાયા હતા.