AnandToday

સરદાર પટેલ યુનિવર્સિટી વલ્લભ વિદ્યાનગરના પ્રોફેસર રમેશ મકવાણાનું  ‘પ્રતિષ્ઠિત શિક્ષણવિદ્ એવોર્ડ–૨૦૨૬’થી સન્માન

શિક્ષણ, સંશોધન અને સમાજસેવામાં વિશિષ્ટ યોગદાન બદલ રાષ્ટ્રીય સ્તરે સન્માન 

૩૫ પુસ્તકો અને ૭૫ સંશોધન પત્રોનું પ્રદાન

આણંદ ટુડે | આણંદ
ઉદયપુર ખાતે ‘લોકશાહી સમાજોમાં માનવઅધિકારોનું વૈશ્વિક પરિદ્રશ્ય’ વિષય પર આયોજિત બે દિવસીય આંતરરાષ્ટ્રીય સેમિનારમાં સમાજશાસ્ત્રી અને સરદાર પટેલ યુનિવર્સિટીના પ્રોફેસર પ્રો. રમેશ મકવાણાને ‘પ્રતિષ્ઠિત શિક્ષણવિદ્ એવોર્ડ–૨૦૨૬’થી સન્માનિત કરવામાં આવ્યા હતા. બદલાવ સંસ્થાન દ્વારા પેસિફિક યુનિવર્સિટીના સભાખંડમાં આયોજિત કાર્યક્રમમાં સંસ્થાનના સ્થાપક ડૉ. શ્રીરામ આર્ય દ્વારા આ સન્માન અર્પણ કરવામાં આવ્યું હતું.
કાર્યક્રમના પ્રારંભે ડૉ. શ્રીરામ આર્યએ માનવ અધિકારોની ઐતિહાસિક પૃષ્ઠભૂમિ અને વૈશ્વિક પરિદ્રશ્યના વિવિધ પાસાઓ અંગે રજૂઆત કરી હતી. પેસિફિક યુનિવર્સિટીના કુલપતિ પ્રો. હેમંત કોઠારીએ ભારતમાં માનવઅધિકારો માટેની બંધારણીય જોગવાઈઓ અને તેમની સુરક્ષા અંગે વિશદ છણાવટ કરી હતી. ડૉ. રજની ધાબાએ અતિથિઓનું સ્વાગત કર્યું હતું.
બદલાવ સંસ્થા દ્વારા દર વર્ષે શિક્ષણ ક્ષેત્રે નોંધપાત્ર યોગદાન આપનાર શિક્ષણવિદોને નિર્ધારિત માપદંડોના આધારે સન્માનિત કરવામાં આવે છે. જેમાં પ્રોફેસર તરીકેનો ૧૦ વર્ષનો અનુભવ, ૧૦ પુસ્તકોનું પ્રકાશન, ૩ સંશોધન પ્રોજેક્ટ્સ, ૨૦ સંશોધન પેપર્સ તેમજ સરકાર દ્વારા પ્રાપ્ત પુરસ્કાર જેવા માપદંડોનો સમાવેશ થાય છે. આ તમામ માપદંડોને પૂર્ણ કરતા પ્રો. મકવાણાને આ પ્રતિષ્ઠિત એવોર્ડ એનાયત કરાયો હતો.

શિક્ષણ અને સંશોધનમાં નોંધપાત્ર પ્રદાન

પ્રો. રમેશ મકવાણાએ શિક્ષણ અને સંશોધન ક્ષેત્રે નોંધપાત્ર યોગદાન આપ્યું છે. તેમના ૩૫ પુસ્તકો અને ૭૫ સંશોધન પત્રો પ્રતિષ્ઠિત જર્નલ્સમાં પ્રકાશિત થયા છે. તેમના માર્ગદર્શન હેઠળ ૫૦ વિદ્યાર્થીઓએ પીએચ.ડી. અને ૫૬ વિદ્યાર્થીઓએ એમ.ફિલ.ની પદવી પ્રાપ્ત કરી છે. તેઓ શિક્ષણ, સંશોધન અને વહીવટનો ૨૯ વર્ષનો યુનિવર્સિટી કક્ષાનો અનુભવ ધરાવે છે.

રાષ્ટ્રીય સ્તરની વિવિધ જવાબદારીઓ

પ્રો. મકવાણા ઓલ ઇન્ડિયા સોશિયોલોજિકલ સોસાયટીની મેનેજિંગ કમિટીના સભ્ય છે. તેઓ ભારત સરકારના જનજાતીય નીતિ આયોગમાં વિષય નિષ્ણાત તેમજ બાબુ જગજીવન રામ ફાઉન્ડેશન, સામાજિક ન્યાય અને સશક્તિકરણ મંત્રાલયમાં સભ્ય તરીકે કાર્યરત છે. તેઓ રાષ્ટ્રીય શિક્ષણ નીતિ–૨૦૨૦ સંબંધિત યુજીસીની સમિતિ તેમજ પીએચ.ડી. એક્સેલન્સ સાયટેશન કમિટીમાં પણ સભ્ય છે.
પ્રો. મકવાણાએ ગ્રામીણ વિકાસમાં મહિલા સરપંચોના પડકારોને ઓળખી તેમના ઉકેલની દિશામાં પણ મહત્વપૂર્ણ કાર્ય કર્યું છે. સમાજસેવાના ક્ષેત્રે તેમના વિશિષ્ટ યોગદાન બદલ ગુજરાત સરકાર દ્વારા તેમને આંબેડકર પુરસ્કાર અને રૂ. ૧ લાખના પુરસ્કારથી સન્માનિત કરવામાં આવ્યા છે. વિદ્યાર્થીઓને નવીનતા, સંશોધન અને વૈજ્ઞાનિક દૃષ્ટિકોણ તરફ પ્રેરિત કરવાની સાથે તેઓ કારકિર્દી માર્ગદર્શક અને રોલ મોડેલ તરીકે પણ કાર્ય કરી રહ્યા છે. તેમના આ સન્માન બદલ યુનિવર્સિટી પરિવાર દ્વારા અભિનંદન અને શુભેચ્છાઓ પાઠવવામાં આવી હતી.