AnandToday

બ્રાન્ડ ફાઇનાન્સના ‘ફૂડ એન્ડ ડ્રિંક 2026 અહેવાલ મુજબ

અમૂલ વિશ્વની સૌથી મજબૂત ડેરી બ્રાન્ડ

અમૂલને બ્રાન્ડ સ્ટ્રેન્થ ઇન્ડેક્સમાં 100 માંથી 93.0 નો સ્કોર તથા AAA+ બ્રાન્ડ સ્ટ્રેન્થ રેટિંગ મળ્યું

આણંદ, 
ગુજરાત કો-ઓપરેટિવ મિલ્ક માર્કેટિંગ ફેડરેશન લિ. (અમૂલ)ને બ્રાન્ડ ફાઇનાન્સના ફૂડ એન્ડ ડ્રિંક 2026ના તારણમાં  વિશ્વની સૌથી મજબૂત ડેરી બ્રાન્ડ તરીકે સ્થાન મળ્યું છે. આ અભ્યાસમાં વિશ્વની સૌથી મૂલ્યવાન અને સૌથી મજબૂત ફૂડ, નોન-આલ્કોહોલિક બેવરેજ તથા ડેરી બ્રાન્ડ્સનું મૂલ્યાંકન કરવામાં આવે છે. અમૂલનું બ્રાન્ડ મૂલ્ય 22 ટકા વધીને 5 અબજ અમેરિકન ડૉલર (USD 5 billion) થયું છે. અમૂલને બ્રાન્ડ સ્ટ્રેન્થ ઇન્ડેક્સમાં 100 માંથી 93.0 નો સ્કોર તથા AAA+ બ્રાન્ડ સ્ટ્રેન્થ રેટિંગ મળ્યું છે.
રાબોબેંકના ‘ગ્લોબલ ડેરી ટોપ 20–2026’ અહેવાલમાં GCMMF (અમૂલ)એ 12મું સ્થાન મેળવ્યું છે, જ્યારે અગાઉના વર્ષના અહેવાલમાં તે 14મા સ્થાને હતું. આ રેન્કિંગ વિશ્વની અગ્રણી ડેરી કંપનીઓ અને સહકારી સંસ્થાઓના વાર્ષિક ડેરી ટર્નઓવર—અમેરિકન ડૉલરમાં—ના આધારે તૈયાર કરવામાં આવે છે.આ અહેવાલમાં વિશ્વની સૌથી મોટી ડેરી કંપનીઓ અને સહકારી સંસ્થાઓના નાણાકીય પ્રદર્શનના આધારે રેન્કિંગ આપવામાં આવે છે.

આ સન્માન 50થી વધુ દેશોમાં અમૂલ પ્રત્યેના 1 અબજથી પણ વધુ ગ્રાહકોના અવિરત વિશ્વાસને પ્રતિબિંબિત કરે છે. અમૂલ દર વર્ષે તેના ઉત્પાદનોના 24 અબજથી વધુ પેકનું વિતરણ કરે છે.
ગુજરાત કો-ઓપરેટિવ મિલ્ક માર્કેટિંગ ફેડરેશન લિ. (GCMMF–અમૂલ)ને ઇન્ટરનેશનલ કો-ઓપરેટિવ એલાયન્સના ‘વર્લ્ડ કો-ઓપરેટિવ મોનિટર 2025’માં દેશના પ્રતિ વ્યક્તિ GDPની સરખામણીએ ટર્નઓવરના સૂચકાંકના આધારે વિશ્વની નંબર 1 સહકારી સંસ્થા તરીકે સ્થાન મળ્યું છે. આ રેન્કિંગ કતારના દોહા શહેરમાં  યોજાયેલી ICA CM50 કોન્ફરન્સ દરમિયાન જાહેર કરવામાં આવ્યું હતું. આ સિદ્ધિ સહકારી મોડલ દ્વારા લાખો ડેરી ખેડૂતોને સશક્ત બનાવવામાં અમૂલના યોગદાનનું પણ પ્રતિબિંબ છે. આ મોડલ સમગ્ર ભારતમાં સર્વસમાવેશક વિકાસ, સામાજિક સમાનતા અને ટકાઉ ગ્રામ વિકાસને પ્રોત્સાહન આપે છે.

અમૂલની સફળતાનો આધાર તેની ત્રણ-સ્તરીય સહકારી વ્યવસ્થામાં છે, જેમાં 18,600થી વધુ ગ્રામ્ય ડેરી સહકારી મંડળીઓ અને 36 લાખ દૂધ ઉત્પાદકો જોડાયેલા છે. મહિલા દૂધ ઉત્પાદકો આ સહકારી વ્યવસ્થાની કરોડરજ્જુ છે. ભારતને દૂધની અછત ધરાવતા રાષ્ટ્રમાંથી વિશ્વના સૌથી મોટા દૂધ ઉત્પાદક દેશ તરીકે પરિવર્તિત કરવામાં ફેડરેશને મહત્વપૂર્ણ ભૂમિકા ભજવી છે અને ગ્રામ્ય આજીવિકા તથા રાષ્ટ્રીય પોષણ સુરક્ષામાં નોંધપાત્ર યોગદાન આપ્યું છે.

 અમૂલ સતત “ધ ટેસ્ટ ઑફ ઇન્ડિયા”ની ભાવનાનું પ્રતિનિધિત્વ કરે છે અને સમગ્ર વિશ્વમાં સહકારી શ્રેષ્ઠતાના માપદંડ તરીકે સ્થાન ધરાવે છે.                              ---

અમૂલ વૈશ્વિક સ્તરે અગ્રેસર

  વિશ્વની બીજી સૌથી મજબૂત ફૂડ બ્રાન્ડ

  વિશ્વની ચોથી સૌથી મૂલ્યવાન ડેરી બ્રાન્ડ

  વિશ્વની 13મી સૌથી મૂલ્યવાન ફૂડ બ્રાન્ડ

  વિશ્વની ટોચની 50 ફૂડ બ્રાન્ડ્સમાં સ્થાન મેળવનારી એકમાત્ર ભારતીય બ્રાન્ડ