AnandToday

ILSASS કોલેજ વલ્લભ વિદ્યાનગરમાં બે દિવસીય ફિલ્મ વર્કશોપ સંપન્ન

સિનેમા એટલે માત્ર મનોરંજન નહીં, પણ સામાજિક બદલાવનું શક્તિશાળી માધ્યમ

ISROના અનુભવી ફિલ્મમેકર કમલેશ ઉદાસી બન્યા વિદ્યાર્થીઓના ગુરુ!

આણંદ ટુડે | વલ્લભ વિદ્યાનગર

આણંદના વલ્લભ વિદ્યાનગર સ્થિત CVM યુનિવર્સિટી સંલગ્ન ILSASS કોલેજના પત્રકારત્વ અને માસ કોમ્યુનિકેશન વિભાગ દ્વારા વિદ્યાર્થીઓમાં સિનેમા અને ફિલ્મ નિર્માણની કલા પ્રત્યે સમજ વિકસાવવા માટે એક વિશેષ બે દિવસીય “Understanding Cinema: Exploring the Process of Filmmaking” વર્કશોપનું સફળ આયોજન કરવામાં આવ્યું હતું. ૧૭ અને ૧૮ ઑગસ્ટ દરમિયાન યોજાયેલા આ વર્કશોપમાં જાણીતા એવોર્ડ વિજેતા ફિલ્મમેકર, શિક્ષક અને મીડિયા કન્સલ્ટન્ટ કમલેશ ઉદાસીએ વિદ્યાર્થીઓને માર્ગદર્શન પૂરું પાડ્યું હતું.

વર્કશોપના મુખ્ય આકર્ષણો અને વિશેષતાઓ:

અનુભવી નિષ્ણાતનું માર્ગદર્શન:

DECU-ISRO સાથે લાંબો સમય કાર્ય કરવાનો અને ૬૦૦ થી વધુ ડોક્યુમેન્ટરી તથા ટેલિવિઝન કાર્યક્રમો બનાવવાનો ત્રણ દાયકાથી વધુનો અનુભવ ધરાવતા કમલેશ ઉદાસીએ વિદ્યાર્થીઓને ફિલ્મના ટેકનિકલ અને સર્જનાત્મક પાસાઓથી અવગત કરાવ્યા.

પ્રખ્યાત ડોક્યુમેન્ટરીઝનું સ્ક્રીનિંગ:

કેદીઓના સુધારાત્મક કાર્યક્રમો પર આધારિત અને ત્રણ આંતરરાષ્ટ્રીય ફિલ્મ ફેસ્ટિવલમાં ફાઇનલિસ્ટ રહેલી ફિલ્મ “The Other Side of the Wall”.

મીઠાના અગરોમાં કામ કરતા શ્રમિકોના સંઘર્ષ અને સ્થળાંતરને ઉજાગર કરતી રાષ્ટ્રીય-આંતરરાષ્ટ્રીય સ્તરે પ્રશંસા પામેલી ફિલ્મ “Sifting Shelters”.

પ્રાયોગિક શિક્ષણ પર ભાર:

વિદ્યાર્થીઓને માત્ર પુસ્તકીય જ્ઞાન સુધી સીમિત ન રાખતા ચર્ચા, જીવંત ઉદાહરણો અને સીધા સંવાદ દ્વારા વાર્તા પસંદગીથી લઈને તેને દૃશ્યાત્મક વાર્તામાં રૂપાંતરિત કરવાની પ્રક્રિયા શીખવવામાં આવી હતી.

આયોજન અને સફળતા

આ સમગ્ર કાર્યક્રમ ડૉ. કૃષ્ણા ત્રિવેદી (હેડ, જર્નાલિઝમ એન્ડ માસ કોમ્યુનિકેશન ડિપાર્ટમેન્ટ)ના ઉત્તમ સંકલન અને મિસ જ્યોતિ ગુપ્તાના સહયોગથી પાર પડ્યો હતો. આ ભગીરથ પ્રયાસને કોલેજના પ્રિન્સિપાલ ડૉ. અર્ચના સી. નરહરી, ડૉ. અંજલિ માછી તથા સંસ્થાના પ્રેસિડેન્ટ એન્જિનિયર શ્રી ભીખુભાઈ પટેલનું સ સઘન પ્રોત્સાહન સાંપડ્યું હતું. આ વર્કશોપના માધ્યમથી વિદ્યાર્થીઓને ભવિષ્યમાં વાસ્તવિક મીડિયા અને ફિલ્મ ક્ષેત્રમાં ઉત્કૃષ્ટ કારકિર્દી બનાવવા માટેનું અમૂલ્ય ભાથું પ્રાપ્ત થયું છે.