AnandToday

રૂપિયાપુરાની વિદ્યાર્થીનીઓનો અનોખો દેશપ્રેમ, વીર જવાનો માટે ગૂંથી સ્નેહની રાખડી

રૂપિયાપુરા ગ્રામ પંચાયતના યુવા સરપંચ શ્રી રમેશભાઈ ઠાકોર (રૂપિયાવાલા) એ  આ રાખડીઓ જવાનો સુધી સુરક્ષિત પહોંચાડવાની જવાબદારી સ્વીકારી

​આણંદ ટુડે | પેટલાદ
​રક્ષાબંધન પર્વની પવિત્ર ભાવનાને દેશપ્રેમ અને રાષ્ટ્રસેવા સાથે જોડતા આણંદ જિલ્લાના રૂપિયાપુરા ગામે એક અત્યંત પ્રેરણાદાયી અને હૃદયસ્પર્શી કાર્યક્રમ યોજાયો હતો. સ્વાતંત્ર્ય પર્વના અવસરે સરકારી પ્રાથમિક શાળા તથા ન્યુ ઈંગ્લિશ સ્કૂલ માધ્યમિક શાળાના વિદ્યાર્થીની ઓએ દેશની સરહદો પર દિવસ-રાત અવિરત ફરજ બજાવતા વીર જવાનો માટે પ્રેમ અને કૃતજ્ઞતાની રાખડીઓ તૈયાર કરી હતી.
​ઇન્વિન્સીબલ એન.જી.ઓ., અમદાવાદની વિશેષ પહેલથી યોજાયેલા આ કાર્યક્રમમાં માસૂમ વિદ્યાર્થી નીઓએ પોતાના નાનકડા અને કોામળ હાથે સુંદર, રંગબેરંગી રાખડીઓ ગૂંથી હતી. માત્ર એટલું જ નહીં, પરંતુ દેશના રક્ષકો પ્રત્યે આદરભાવ વ્યક્ત કરતા લાગણીસભર અને પ્રેરણાદાયી સંદેશાઓ પણ લખ્યા હતા. આ રાખડીઓ માત્ર તહેવારની ઉજવણી પૂરતી મર્યાદિત ન રહેતા, સીધી સરહદના જવાનો સાથે રાષ્ટ્રપ્રેમનું અતૂટ બંધન જોડવાનો અદ્ભુત પ્રયાસ બની રહી હતી.
​આ વિશેષ પ્રસંગે રૂપિયાપુરા ગ્રામ પંચાયતના યુવા સરપંચ રમેશભાઈ ઠાકોર (રૂપિયાવાલા) એ વિદ્યાર્થીઓ દ્વારા તૈયાર કરાયેલી તમામ રાખડીઓ સહર્ષ સ્વીકારી હતી. તેમણે વીર જવાનો સુધી આ રાખડીઓ અને વિદ્યાર્થીનીઓનો આભાર સંદેશ સુરક્ષિત પહોંચાડવાની તમામ જવાબદારી સ્વીકારી હતી.
​યુવા સરપંચે વિદ્યાર્થીનીઓના આ દેશપ્રેમથી ભરપૂર પ્રયાસને ખુબ બિરદાવ્યો હતો. તેમણે જણાવ્યું હતું કે, દેશની સુરક્ષા માટે સર્વસ્વ સમર્પિત કરનાર જવાનો પ્રત્યે કૃતજ્ઞતા વ્યક્ત કરવી આપણી નૈતિક ફરજ છે. નાનકડા બાળકોની આ પહેલથી શાળામાં રાષ્ટ્રપ્રેમ અને દેશસેવાની ભાવના વધુ પ્રબળ બની છે. જ્યારે આ રાખડીઓ સરહદ પર તૈનાત જવાનોના કાંડે બંધાશે, ત્યારે તેમને પોતાના પરિવાર અને દેશવાસીઓના અપાર પ્રેમની ઉષ્માનો અનુભવ કરાવશે.
​બંને શાળાઓના આચાર્યશ્રીઓ અને સમગ્ર શૈક્ષણિક પરિવારે બાળકોના આ સરાહનીય કાર્યને પ્રોત્સાહન પૂરું પાડ્યું હતું. રૂપિયાપુરાના વિદ્યાર્થીનીઓની આ પહેલ ખરેખર “રાખડીમાં રાષ્ટ્રપ્રેમ અને લાગણીમાં દેશભક્તિ”નું ઉત્તમ અને જીવંત ઉદાહરણ પૂરું પાડે છે.