AnandToday

માનવતાનું ઉત્કૃષ્ટ ઉદાહરણ

SVIT વાસદનો વિદ્યાર્થી બ્લડ કેન્સર પીડિત બાળક માટે બન્યો દેવદૂત

૧૯ વર્ષીય કેરુલ શાહે રક્ત સ્ટેમ સેલ દાન કરી બે વર્ષના લ્યુકેમિયાગ્રસ્ત બાળકને આપ્યું નવું જીવન

આણંદ ટુડે | વાસદ
આણંદના વાસદ સ્થિત સરદાર વલ્લભભાઈ પટેલ ઇન્સ્ટિટ્યૂટ ઓફ ટેકનોલોજી (SVIT) ના ૧૯ વર્ષીય વિદ્યાર્થી કેરુલ શાહે  રક્ત સ્ટેમ સેલ (Blood Stem Cell) નું સફળ દાન કરીને બ્લડ કેન્સર (લ્યુકેમિયા) થી પીડાતા માત્ર બે વર્ષના નાનકડા બાળકને નવું જીવન આપ્યું છે

કેરુલ શાહે ઓક્ટોબર ૨૦૨૫માં SVIT NSS યુનિટ દ્વારા યોજાયેલા રક્ત સ્ટેમ સેલ જાગૃતિ શિબિરમાં માત્ર ૧૮ વર્ષની વયે સ્વૈચ્છિક દાતા તરીકે નોંધણી કરાવી હતી. HLA મેચિંગ દરમિયાન તેમનું સેલ બે વર્ષના બાળક સાથે મેચ થતાં તેમણે કોઈપણ સંકોચ વગર દાન માટે સંમતિ આપી હતી. આ સમગ્ર પ્રક્રિયામાં પરિવારજનોનો સહયોગ તેમજ DATRI રજિસ્ટ્રીના પ્રતિનિધિ ભરતસિંહ બારીયા અને NSS પ્રોગ્રામ ઓફિસર ડૉ. વિકાશ અગ્રવાલનું માર્ગદર્શન મહત્વપૂર્ણ રહ્યું હતું. સ્ટેમ સેલ ટ્રાન્સપ્લાન્ટ એ લ્યુકેમિયા અને થેલેસેમિયા જેવા ગંભીર રોગો માટે જીવનરક્ષક છે, ત્યારે યુવાનોએ આગળ આવવું જરૂરી છે.

બાળકને નવું જીવન આપનાર Gen-Z ના આ યુવાન પ્રતિભાશાળી વિદ્યાર્થીને સંસ્થાના ચેરમેન શ્રી ભાવેશભાઈ પટેલ, આચાર્ય ડૉ. ડી. પી. સોની તેમજ NSS પ્રોગ્રામ ઓફિસર ડૉ. વિકાશ અગ્રવાલ દ્વારા ઉજ્જવળ ભવિષ્યની હાર્દિક શુભેચ્છાઓ પાઠવવામાં આવી છે.
સંસ્થાના પદાધિકારીઓએ ૧૮ થી ૫૦ વર્ષના નાગરિકોને આ ઉમદા કાર્યમાં જોડાવા અપીલ કરી છે.