AnandToday

પશુપાલકો માટે અમૂલની ખુશખબર

૧ જૂનથી દૂધ ખરીદીના ભાવમાં પ્રતિ કિલો ફેટે રૂ.૧૦નો વધારો, પશુપાલકોને મળશે વધુ લાભ

ભેંસના દૂધના ખરીદી ભાવમાં પ્રતિ કિલો ફેટે રૂ.૧૦નો વધારો

૬% ફેટવાળા દૂધનો ભાવ હવે રૂ.૫૪.૦૫ પ્રતિ લિટર

૭% ફેટવાળા દૂધનો ભાવ રૂ.૬૩.૦૬ પ્રતિ લિટર

ગાયના દૂધના ભાવમાં પણ વધારો

 ૩.૫% ફેટવાળા દૂધનો ભાવ હવે રૂ.૩૬.૬૮ પ્રતિ લિટર

 ૪% ફેટવાળા દૂધનો ભાવ રૂ.૩૮.૬૮ પ્રતિ લિટર
નાણાકીય વર્ષ ૨૦૨૫-૨૬ માટે અમૂલએ પ્રતિ કિલો ફેટનો અંતિમ ભાવ રૂ.૧૦૩૫ જાહેર કર્યો, જે અત્યાર સુધીનો સર્વોચ્ચ દર ગણાય છે.

 પશુપાલકોના આર્થિક સશક્તિકરણ માટે અમૂલ સતત પ્રતિબદ્ધ માત્ર રૂ.૨૫માં સેક્સડ સીમેન યોજના પણ બની આશીર્વાદરૂપ

આણંદ ટુડે | આણંદ
અમૂલ ડેરી આણંદ દ્વારા પશુપાલકોને મોટી રાહત આપતો મહત્વપૂર્ણ નિર્ણય લેવામાં આવ્યો છે. ડેરીના ચેરમેન સાંભેસિંહ પરમારે જાહેરાત કરી છે કે તારીખ ૦૧ જૂન ૨૦૨૬ની સવારથી દૂધ ખરીદીના ભાવમાં વધારો અમલમાં મૂકવામાં આવશે.
મધ્ય પૂર્વમાં ચાલી રહેલા યુદ્ધ, તેલ સંકટ અને વૈશ્વિક આર્થિક દબાણ વચ્ચે ડેરી ઉદ્યોગ પર વધતા ખર્ચનો પ્રભાવ પડ્યો છે. LPG, LDO, પેકિંગ મટીરિયલ, પરિવહન ખર્ચ તેમજ પશુઆહારના કાચા માલના ભાવમાં નોંધપાત્ર વધારો થયો હોવા છતાં અમૂલ ડેરીએ પશુપાલકોના હિતને પ્રથમ પ્રાથમિકતા આપી છે.
અમૂલ ડેરીએ ભેંસના દૂધના ખરીદી ભાવમાં પ્રતિ કિલો ફેટે રૂ.૧૦નો વધારો જાહેર કર્યો છે. હવે ભેંસના દૂધનો ભાવ રૂ.૮૬૫થી વધારી રૂ.૮૭૫ પ્રતિ કિલો ફેટ કરવામાં આવ્યો છે. આ વધારાના કારણે ૬ ટકા ફેટવાળા ભેંસના દૂધના પ્રતિ લિટર ભાવમાં રૂ.૦.૬૧નો વધારો થઈ હવે રૂ.૫૪.૦૫ પ્રતિ લિટર મળશે, જ્યારે ૭ ટકા ફેટવાળા દૂધનો ભાવ રૂ.૬૩.૦૬ પ્રતિ લિટર થશે.તે જ રીતે ગાયના દૂધના ખરીદી ભાવમાં પણ વધારો કરાયો છે. અગાઉ રૂ.૩૮૪.૧૦ પ્રતિ કિલો સમતુલ્ય ફેટના ભાવે ખરીદાતું ગાયનું દૂધ હવે રૂ.૩૮૮.૬૫ના ભાવે ખરીદાશે. એટલે કે પ્રતિ કિલો સમતુલ્ય ફેટે રૂ.૪.૫૫નો વધારો કરવામાં આવ્યો છે. ૩.૫ ટકા ફેટવાળા ગાયના દૂધના પ્રતિ લિટર ભાવમાં રૂ.૦.૪૩નો વધારો થઈ હવે રૂ.૩૬.૬૮ મળશે, જ્યારે ૪ ટકા ફેટવાળા દૂધનો ભાવ રૂ.૩૮.૬૮ પ્રતિ લિટર થશે.
આ સાથે અમૂલ ડેરીએ નાણાકીય વર્ષ ૨૦૨૫-૨૬ માટે પ્રતિ કિલો ફેટનો અંતિમ ભાવ રૂ.૧૦૩૫ જાહેર કર્યો છે, જે અમૂલના ઈતિહાસમાં અત્યાર સુધીનો સર્વોચ્ચ દર માનવામાં આવી રહ્યો છે. ગુજરાત તથા દેશના દૂધ ક્ષેત્રમાં પણ આ દર સૌથી ઊંચા દરોમાંનો એક ગણાય છે.
અમૂલ ડેરીએ વર્ષ દરમિયાન રૂ.૧૫,૧૧૩ કરોડનું ટર્નઓવર હાંસલ કર્યું હોવાનું જણાવ્યું છે અને આગામી નાણાકીય વર્ષ માટે રૂ.૧૬,૭૫૩ કરોડનું ટર્નઓવર લક્ષ્ય નક્કી કરવામાં આવ્યું છે.
પશુપાલન ક્ષેત્રના વિકાસ માટે અમૂલ દ્વારા અનેક યોજનાઓ અમલમાં મૂકાઈ રહી છે. ખાસ કરીને માત્ર રૂ.૨૫ પ્રતિ ડોઝના દરે સેક્સડ સીમેન ઉપલબ્ધ કરાવવાની યોજના પશુપાલકો માટે આશીર્વાદરૂપ બની છે. ઓણ ખાતે એશિયાની સૌથી મોટી સીમેન લેબ સ્થાપીને ગુણવત્તાસભર પશુવંશ વિકાસ અને વધુ દૂધ ઉત્પાદન તરફ મહત્વપૂર્ણ પગલું ભરાયું છે.
અમૂલ ડેરીએ સ્પષ્ટ કર્યું છે કે ખેડૂતો અને પશુપાલકોના આર્થિક સશક્તિકરણ માટે સંસ્થા હંમેશા પ્રતિબદ્ધ રહી છે અને ભવિષ્યમાં પણ આ દિશામાં સતત કાર્ય કરતી રહેશે.