આણંદ ટુડે | આણંદ
આણંદના તબીબી ક્ષેત્ર માટે ગૌરવની ક્ષણ સર્જાઈ છે. આણંદના જાણીતા ઈ.એન.ટી. સર્જન ડૉ. મમતા લાંબા એ વડોદરાના ૧૬ વર્ષીય કિશોરના નાકમાંથી વિશ્વની અતિ દુર્લભ ગણાતી ‘ઓસીફાઈંગ ફાઈબ્રોમા ઓફ મિડલ ટર્બિનેટ’ નામની ગાંઠ સફળતાપૂર્વક દૂર કરી તબીબી જગતમાં અનોખી સિદ્ધિ હાંસલ કરી છે.
છેલ્લા એક વર્ષથી કિશોર નાક બંધ થવું, ભારે નસકોરા આવવા તથા શ્વાસ લેવામાં તકલીફ જેવી ગંભીર સમસ્યાઓથી પીડાઈ રહ્યો હતો. અનેક નિષ્ણાત ડોક્ટરો પાસે સારવાર છતાં યોગ્ય નિદાન ન થતા અંતે પરિવારજનોએ આણંદ ખાતે ડૉ. મમતા લાંબાનો સંપર્ક કર્યો હતો. તપાસ દરમિયાન CT સ્કેનમાં નાકના અંદરના હાડકાના ભાગમાં કેલ્શિયમયુક્ત સખત ગાંઠ હોવાનું સામે આવ્યું હતું.
ડૉ. મમતા લાંબાએ અત્યાધુનિક એન્ડોસ્કોપિક સાઈનસ સર્જરી અને ડિબ્રાઈડર ટેકનિક દ્વારા કોઈપણ બહારનો ચીરો મૂક્યા વગર નાકના નસકોરા મારફતે જ ગાંઠ સફળતાપૂર્વક દૂર કરી હતી. સર્જરી બાદ કિશોર હવે સામાન્ય રીતે શ્વાસ લઈ શકે છે અને તેના ચહેરા પર કોઈપણ ડાઘ રહ્યો નથી.
તબીબી નિષ્ણાતોના જણાવ્યા મુજબ ‘ઓસીફાઈંગ ફાઈબ્રોમા’ સામાન્ય રીતે જડબાના ભાગમાં જોવા મળે છે, પરંતુ નાકના “મિડલ ટર્બિનેટ” જેવા ભાગમાં આ ગાંઠ થવી અત્યંત વિરલ ઘટના માનવામાં આવે છે. અત્યાર સુધી વિશ્વભરમાં આવા માત્ર ૬ કેસ નોંધાયા હોવાનું માનવામાં આવે છે. સમયસર સર્જરી ન થઈ હોત તો દર્દીના ચહેરામાં વિકૃતિ કે આંખની દૃષ્ટિ પર કાયમી અસર થવાની શક્યતા હતી.
સર્જરી બાદ ડૉ. મમતા લાંબાએ જણાવ્યું હતું કે, સતત નાક બંધ રહેવું કે ભારે નસકોરા આવવા જેવી સમસ્યાઓને માત્ર એલર્જી માની અવગણવી ન જોઈએ. સમયસર યોગ્ય નિદાન અને સારવારથી ગંભીર બીમારીઓને ટાળી શકાય છે.
Copyright © Copyright © anandtoday.com. All rights reserved