AnandToday

ચરોતરની મહિલા શક્તિનું રાજ્યમાં ગુંજ્યું નામ

ડો. હંસા કુંવરબા રાજને મળ્યો પ્રતિષ્ઠિત રાજ્ય મહિલા વિકાસ પુરસ્કાર

મહિલા વિકાસ ક્ષેત્રે નોંધપાત્ર સેવા બદલ મુખ્યમંત્રીશ્રીના હસ્તે સન્માન

આણંદ ટુડે | આણંદ
આંતરરાષ્ટ્રીય મહિલા દિવસની ઉજવણી નિમિત્તે આણંદ જિલ્લાના અડાસ ગામના ડો. હંસા કુંવરબા રાજને રાજ્યના મુખ્યમંત્રી શ્રી ભૂપેન્દ્રભાઈ પટેલના હસ્તે રાજ્ય કક્ષાનો મહિલા વિકાસ પુરસ્કાર એનાયત કરવામાં આવ્યો હતો. 

ડો.હંસા કુંવરબા રાજે મહિલા સશક્તિકરણ ક્ષેત્રે નોંધપાત્ર યોગદાન આપ્યું છે. જે અંતર્ગત આ પુરસ્કાર એનાયત કરવામાં આવ્યો હતો હંસા કુંવરબા રાજે ખાસ કરીને દીકરીઓના શિક્ષણ અને મહિલાઓને આર્થિક રીતે આત્મનિર્ભર બનાવવાની દિશામાં શ્રેષ્ઠ કામગીરી કરી છે.આ ઉપરાંત તેમનું એક મહત્વનું પ્રદાન કુટુંબ વ્યવસ્થા જાળવી રાખવાનું રહ્યું છે. વિભક્ત કુટુંબોના વધતા પ્રમાણ વચ્ચે તેમણે સંયુક્ત કુટુંબની ભાવના જાળવી રાખવા અને પતિ પત્ની વચ્ચેના વિખવાદો ઘટાડી છૂટાછેડાના કિસ્સાઓ અટકાવવા માટેના પ્રયાસો કર્યા છે. 

હંસા કુંવરબા આજે રાજ્ય સરકારની વિવિધ મહિલા લક્ષી યોજનાઓના લાભો છેવાડાની ગામની મહિલાઓ સુધી પહોંચાડીને તેમને કલ્યાણકારી પ્રવૃત્તિઓ થી વાકેફ કર્યા છે. 

આમ આણંદ જિલ્લાના ડો. હંસા કુંવરબા રાજ દ્વારા મહિલાલક્ષી કરવામાં આવતી કામગીરીને ધ્યાને લઈને રાજ્યના મુખ્યમંત્રી શ્રી ભુપેન્દ્રભાઈ પટેલ દ્વારા આંતરરાષ્ટ્રીય મહિલા દિવસ નિમિત્તે તેમને રાજ્ય મહિલા વિકાસ પુરસ્કાર એનાયત કરવામાં આવ્યો હતો. 

આ સમયે મહિલા અને બાળ કલ્યાણ મંત્રી શ્રી મનીષાબેન વકીલ ઉપસ્થિત રહ્યા હતા. 

ડો. હંસા કુંવરબા રાજને અન્ન અને નાગરિક પુરવઠા મંત્રી શ્રી રમણભાઈ પટેલ, નાણાં રાજ્ય મંત્રી શ્રી કમલેશભાઈ પટેલ, જિલ્લા પંચાયત પ્રમુખશ્રી હસમુખભાઈ પટેલ, સાંસદ શ્રી મિતેશભાઈ પટેલ તથા આણંદ જિલ્લાના અગ્રણી શ્રી સંજયભાઈ પટેલે શુભેચ્છાઓ પાઠવી હતી.