આણંદ જિલ્લાના ગ્રામ્ય વિસ્તારના વિકાસ રથના સારથિ તરીકે જિલ્લા વિકાસ અધિકારી શ્રી દેવાહુતી (IAS) એક મક્કમ અને સંવેદનશીલ નેતૃત્વ પૂરું પાડી રહ્યા છે. તેમના કુશળ માર્ગદર્શન હેઠળ જિલ્લા પંચાયતના તમામ વિભાગો એક સૂત્રતાથી કાર્ય કરી રહ્યા છે, જેના પરિણામે ગ્રામીણ સ્તરે સરકારી યોજનાઓનું અમલીકરણ અત્યંત પારદર્શી અને વેગવંતું બન્યું છે. ખાસ કરીને કુ-પોષણ, શિક્ષણ, આરોગ્ય અને મહિલા સશક્તિકરણના કાર્યોમાં તેઓ વ્યક્તિગત રસ લઈને પાયાની સુવિધાઓ સુદ્રઢ કરી રહ્યા છે. એક ઉચ્ચ વહીવટી અધિકારી તરીકેની તેમની કર્તવ્યનિષ્ઠા અને સહકર્મચારીઓને પ્રોત્સાહિત કરવાની શૈલીને કારણે જ આજે આણંદ જિલ્લા પંચાયત વહીવટી ક્ષેત્રે નવા આયામો સર કરી રહયું છે. છેવાડાના માનવીને વિકાસની મુખ્ય ધારામાં જોડવાની તેમની પ્રતિબદ્ધતા સમગ્ર જિલ્લાના વહીવટી તંત્ર માટે ઉર્જાસ્ત્રોત સમાન બની છે.
જિલ્લા પંચાયતમાં કાર્યરત મહિલા અધિકારીશ્રીઓની વાત કરીએ તો, જિલ્લા વિકાસ અધિકારીશ્રી દેવાહુતીના માર્ગદર્શન હેઠળ નાયબ જિલ્લા વિકાસ અધિકારી તરીકે રૂબી સિંહ રાજપુત અને કિંજલ દેસાઈ વહીવટની ધુરા સંભાળી રહ્યા છે. ગ્રામીણ શિક્ષણમાં અર્ચનાબેન પ્રજાપતિ, આણંદ જિલ્લાને કુપોષણ મૂક્ત બનાવવા માટે કાર્ય કરતાં જિલ્લા પ્રોગ્રામ ઓફિસર તેજલબેન ગોસ્વામી, સમાજ કલ્યાણમાં વંદનાબેન સુતરીયા અને આરોગ્ય ક્ષેત્રે ડો. પૂર્વી નાયક જેવા અધિકારીઓ રાત-દિવસ સેવારત છે. આ ઉપરાંત આંકડાકીય અને હિસાબી કામગીરીમાં કોકિલાબેન અંકોલીયા અને વર્ષાબા ઝાલા જેવી સક્ષમ મહિલાઓ કાર્યભાર સંભાળી રહી છે. આ તમામ અધિકારીઓ પંચાયતી રાજના માધ્યમથી ગામડાઓના વિકાસને નવી દિશા આપી રહ્યા છે. આ મહિલા અધિકારીશ્રીઓના કારણે આણંદ જિલ્લા પંચાયત આજે મહિલા સશક્તિકરણનું જીવંત ઉદાહરણ બની રહ્યું છે,
જિલ્લાના વિકાસના મુખ્ય કેન્દ્ર સમાન કલેકટર કચેરીમાં પણ મહિલા અધિકારીઓનો સિંહફાળો જોવા મળે છે. નાયબ કલેકટર હેતલબેન ભાલીયા અને જિલ્લા પુરવઠા અધિકારી જીજ્ઞા શાહ જેવા અધિકારીઓ લોકોની સમસ્યાઓના નિરાકરણ માટે કાર્યરત છે. ચૂંટણી પ્રક્રિયા અને એસ.આઈ.આર. જેવી જટિલ જવાબદારી પણ અનિતાબેન લાછુન જેવા અનુભવી અધિકારીઓ કુશળતાપૂર્વક નિભાવી રહ્યા છે. આ મહિલા અધિકારીઓ સામાન્ય નાગરિકના હક્ક અને સુરક્ષા માટે મજબૂત રક્ષક બનીને ઉભી છે.
શિક્ષણ જગતમાં કામિનીબેન ત્રિવેદી અને રોજગાર ક્ષેત્રે મીનાક્ષી ચૌહાણ યુવાનોના ભવિષ્યને ઘડવા સતત કાર્યરત છે. વન વિભાગમાં એસીએફ પ્રિયંકાબેન જોષી અને આર.એફ.ઓ હેમાંગી મોદી પર્યાવરણના જતનનું કાર્ય કરી રહ્યા છે, તો નિલેશ્વરીબા ગોહિલ મહિલા અને બાળ વિકાસ માટે કાર્યરત છે. આ ઉપરાંત બાગાયત વિભાગમાં સ્મીતાબેન પિલ્લઈ, મત્સ્યોદ્યોગમાં બિંદિયા ઠક્કર, લેન્ડ રેકોર્ડ કચેરીમાં અવનીબેન ચૌહાણ અને એકતાબેન પટેલ તેમજ તિજોરી કચેરીમાં નિશાબેન સુવાગિયા જેવા મહિલા અધિકારીઓ તેમની કુશળતા સાબિત કરી છે. આ તમામ સરકારી વિભાગોમાં મહિલાઓનું વર્ચસ્વ સાબિત કરે છે કે પ્રત્યેક ક્ષેત્રમાં નારી શક્તિએ પોતાનુ સામર્થ્ય પ્રસ્થાપિત કર્યુ છે.
આણંદ જિલ્લામાં કાયદો અને વ્યવસ્થા જાળવવામાં નાયબ પોલીસ અધિક્ષક રિદ્ધિ ગુપ્તે મહત્વપૂર્ણ ભૂમિકા ભજવી રહ્યા છે, ઇજનેરી ક્ષેત્રે માર્ગ અને મકાન વિભાગમાં કૃતિબેન જોશી અને નગરપાલિકાના વહીવટમાં નીલમબેન રોય કામગીરી કરી રહયાં છે. રાજ્ય વેરા કમિશનર ધૃતિબેન સોની અને તાલુકા વિકાસ અધિકારી જેનીબેન ગઢવી જેવા અધિકારીઓ મહેસૂલ અને વિકાસના પૈડાંને ગતિ આપી રહ્યા છે. આ મહિલાઓ ખરા અર્થમાં ફિલ્ડ પર રહીને લોકકલ્યાણના કામોને ઓપ આપી રહયા છે.
આ તમામ મહિલા અધિકારીઓની સૌથી મોટી વિશેષતા એ છે કે, તેઓ રાજ્ય સરકારની વિવિધ યોજનાઓને છેવાડાના માનવી સુધી પહોંચાડવા માટે અત્યંત સંવેદનશીલ છે. વિનામૂલ્યે અનાજ હોય, આરોગ્યલક્ષી સહાય હોય, શૈક્ષણિક લાભ હોય કે પછી, અન્ય યોજનાકિય લાભ. આ અધિકારીઓ એ સુનિશ્ચિત કરે છે કે સાચો લાભાર્થી ક્યાંય વંચિત ન રહી જાય. તેમની કામ કરવાની શૈલીમાં માનવીય અભિગમ અને વહીવટી કડકાઈનો અદભૂત સમન્વય જોવા મળે છે. આંતરરાષ્ટ્રીય મહિલા દિવસે આણંદ જિલ્લામાં સેવારત આ મહિલા અધિકારીઓને સલામ...
******
Copyright © Copyright © anandtoday.com. All rights reserved