AnandToday

નેશનલ સ્પોર્ટ્સ ડે સેલિબ્રેશન, આણંદ ખાતે સાયકલ રેલી યોજાઈ

કરમસદ આણંદ મહાનગરપાલિકા અને જિલ્લા વહીવટી તંત્રના સંયુક્ત ઉપક્રમે આણંદ ખાતે સાયકલ રેલીનું આયોજન કરાયું 

નાયબ મુખ્ય દંડકશ્રી સહિતના મહાનુભાવો  ટાઉન હોલથી શાસ્ત્રી મેદાન સુધી યોજાયેલ સાયકલ રેલીમાં સહભાગી બન્યા

આણંદ ટુડે | આણંદ,
ખેલરત્ન મેજર ધ્યાનચંદજીની જન્મજયંતિની ત્રી -દિવસીય  નેશનલ સ્પોર્ટ્સ ડે સેલિબ્રેશન થકી ઊજવણી કરાઈ રહી છે, ત્યારે આણંદ ખાતે સન્ડે ઓન સાઇકલ કાર્યક્રમ અંતર્ગત કરમસદ આણંદ મહાનગરપાલિકા અને જિલ્લા વહીવટી તંત્ર આણંદના સંયુક્ત ઉપક્રમે આજ રોજ નાયબ મુખ્ય દંડક શ્રી રમણભાઈ સોલંકીની વિશેષ ઉપસ્થિતિમાં આણંદ ટાઉન હોલથી શાસ્ત્રી મેદાન વલ્લભ વિદ્યાનગર સુધી સાયકલ રેલીનું આયોજન કરવામાં આવ્યું હતું.

આ વેળાએ નાયબ મુખ્ય દંડક શ્રી રમણભાઈ સોલંકીએ જણાવ્યું હતું કે, મેજર ધ્યાનચંદજી ની જન્મજયંતિ નેશનલ સ્પોર્ટ્સ ડે તરીકે ઉજવાઈ રહી છે, ત્યારે નગરજનોએ પણ સ્પોર્ટ્સનું મહત્વ સમજીને પોતાના જીવનમાં અપનાવવું જોઈએ, સ્પોર્ટ્સ થકી સ્વાસ્થ્ય જળવાઈ રહે છે, જેથી નિયમિત સાયકલિંગ પણ કરવું જોઈએ, તેમ તેમણે વધુમાં ઉમેર્યું હતું અને આ સાયકલ રેલીમાં સહભાગી બનવા બદલ સૌને અભિનંદન પણ પાઠવ્યા હતા.

આ સાયકલ રેલીમાં જિલ્લા પંચાયત પ્રમુખ શ્રી હસમુખભાઈ પટેલ, કરમસદ આણંદ મહાનગરપાલિકાના કમિશનર શ્રી મિલિંદ બાપના,જિલ્લા પોલીસ અધિક્ષકશ્રી ગૌરવ જસાણી, નિવાસી અધિક કલેકટર શ્રી આર. એસ.દેસાઈ, નાયબ મ્યુનિસિપલ કમિશનર શ્રી નિલાક્ષ મકવાણા, શ્રી એસ. કે. ગરવાલ, નાયબ પોલીસ અધિક્ષક શ્રી જે. એન. પંચાલ, પદાધિકારીઓ, રમતવીરો સહિત  કરમસદ આણંદ મ્યુનિસિપલ કોર્પોરેશના અધિકારીઓ,પોલીસ કર્મીઓ, વિવિધ કચેરીઓના અધિકારીઓ, કર્મચારીઓ, વિદ્યાર્થીઓ તથા નગરજનો મોટી સંખ્યામાં જોડાયા હતા.
***