આણંદ ટુડે I આણંદ,
ગુજરાતના તમામ ડેરી સહકારી સંઘની મધ્યસ્થ સંસ્થા અને અમૂલ બ્રાન્ડનું માર્કેટીંગ કરતી સંસ્થા ગુજરાત કો-ઓપરેટીવ મિલ્ક માર્કેટીંગ ફેડરેશન (જીસીએમએમએફ) હાલમાં તેનું ગોલ્ડન જ્યુબિલી વર્ષ મનાવી રહી છે. 1973માં માત્ર 6 સભ્યો અને રૂ.121 કરોડના ટર્નઓવર સાથે શરૂ કરાયેલી જીસીએમએમએફ હાલમાં ગુજરાતમાં 18 સભ્ય સંઘ ધરાવે છે અને 3 કરોડ લીટરથી વધારે દૂધ એકત્રિત કરે છે. રૂ.72,000 કરોડ (9 અબજ યુએસ ડોલર) નું ટર્નઓવર કરીને અમૂલ ભારતની સૌથી મોટી એફએમસીજી બ્રાન્ડ બની છે. અમૂલ કે જેને હાલમાં દુનિયામાં 8મા નંબરની સૌથી મોટી ડેરી સંસ્થા ગણવામાં આવે છે તેણે વર્ષ 2022-23માં તેના ગ્રુપ ટર્નઓવરમાં વધુ રૂ.11,000 કરોડનો ઉમેરો કર્યો છે.
તા.19 ઓગષ્ટ, 2023ના રોજ યોજાયેલી જીસીએમએમએફની 49મી વાર્ષિક સામાન્ય સભા પછી જીસીએમએમએફના ચેરમેન શ્રી શામળભાઈ પટેલે માહિતી આપી હતી કે વર્ષ 2022-23માં સંસ્થાએ 18.5 ટકાની વૃધ્ધિ હાંસલ કરી છે. છેલ્લા 50 વર્ષમાં આપણે ડેરી ખેડૂતો અને ગ્રાહકો વચ્ચે સેતુ બનવાના સિદ્ધાંત પર સાચા રહેવામાં સફળ રહ્યા છીએ. જે દ્રષ્ટિ સાથે જીસીએમએમએફની સ્થાપના અમારા છ સ્થાપક શ્રી ત્રિભુવનદાસ પટેલ, શ્રી મોતીભાઈ ચૌધરી, શ્રી ગલબાભાઈ પટેલ, શ્રી ભૂરાભાઈ પટેલ, શ્રી જગજીવનદાસ પટેલ, શ્રી જશવંતલાલ શાહ અને ડો. વર્ગીસ કુરિયન દ્વારા કરવામાં આવી, અમૂલને પેઢીઓ સુધી દરેક ભારતીયની પ્રિય બ્રાન્ડ બનાવી છે. ડેરી ક્ષેત્રના અમૂલ મોડલે ખેડૂતોના આર્થિક અને સામાજીક વિકાસ સફળ અને આત્મનિર્ભર તેમજ અર્થક્ષમ આપીને ભારતને દુનિયામાં ગૌરવ અપાવ્યું છે. આપણે ગૌરવપૂર્વક કહી શકીએ તેમ છીએ કે ગુજરાતના ડેરી ક્ષેત્રના ખેડૂતોએ એક એવુ મોડલ તૈયાર કર્યું છે કે જેની ખૂબ ઓછા લોકો કલ્પના કરી શકે તેમ, 36 લાખ ડેરી ક્ષેત્રના ખેડૂતો આ બ્રાન્ડના સાચા માલિક છે.”
મજબૂત અને સુગમ પધ્ધતિઓ તેમજ પ્રક્રિયાઓ મારફતે આપણે આપણાં દુનિયાના ગ્રાહકો સુધી પહોંચીને આગામી બે થી ત્રણ વર્ષમાં રૂ.1 લાખ કરોડનું ટર્નઓવર હાંસલ કરવાનો ઉદ્દેશ ધરાવીએ છીએ.
“નાણાંકિય વર્ષ 2022-23 દરમ્યાન આપણે આપણી મોટાભાગની ફ્લેગશીપ કેટેગરીમાં વિવિધ સિમાચિહ્નો હાંસલ કર્યા છે. અમૂલના દૂધ આધારિત પીણાંમાં 34 ટકાની વૃધ્ધિ થઈ છે. અમૂલ આઈસ્ક્રિમમાં 40 ટકા જેટલી વૃધ્ધિ નોંધાઈ છે. અમૂલ બટરમાં 19 ટકા, તથા અમૂલ ઘીના કન્ઝ્યુમર પેકમાં 9 ટકાનો વધારો નોંધાયો છે. અમૂલ લોન્ગલાઈફ મિલ્કમાં 20 ટકાની વૃધ્ધિ, અમૂલ દહીંમાં 40 ટકાની વૃધ્ધિ, અમૂલની તાજી છાશમાં 16 ટકાની અસરકારક વૃધ્ધિ, અને આપણી સૌથી મોટી પ્રોડક્ટ કેટેગરી અમૂલ તાજા દૂધમાં પ્રભાવશાળી 20 ટકાની વૃદ્ધિ નોંધાઈ છે. આપણે મોટાભાગની કન્ઝ્યુમર પ્રોડક્ટસમાં હાઈવોલ્યુમ ગ્રોથ નોંધાવ્યો છે” તેમ જીસીએમએમએફના ઈનચાર્જ એમડી શ્રી જયેન મહેતાએ જણાવ્યું.
જીસીએમએમએફના વાઈસ ચેરમેન શ્રી વલમજી હુંબલએ જણાવ્યું કે, “ભારતની વસતિમાં વધારાની અને માથાદીઠ આવક વૃધ્ધિ સાથે, પ્રક્રિયાથી આવનારા વર્ષોમાં સંસ્થાની વૃધ્ધિને પ્રોત્સાહન મળશે. તેમણે વધુમાં જણાવ્યું હતું કે આપણે એવા વ્યૂહાત્મક પ્રયાસો હાથ ધરી રહ્યા છીએ કે જેનાથી આપણી હાજરી ભારતના દરેક શહેર, નગર અને ગામમાં વર્તાશે. વિશ્વનું ડેરી માર્કેટ પણ વૃધ્ધિની નોંધપાત્ર તકો ધરાવે છે. આપણે હાલમાં 50થી વધુ દેશમાં હાજરી ધરાવીએ છીએ અને વ્યૂહાત્મક બજારોમાં આપણી હાજરી વિસ્તારવા માટે સક્રિય છીએ.”
તેમણે એવી પણ માહિતી આપી હતી કે સહકાર વિભાગનું અલાયદુ મંત્રાલય રચવા બદલ અમે ભારત સરકારના આભારી છીએ. આ મંત્રાલયની રચનાને કારણે ત્રણ મલ્ટી-સ્ટેટ કોઓપરેટીવ્ઝની સ્થાપના કરવા માટેની પ્રેરણા મળી છે, જેમાં દેશની સહકારી સંસ્થાઓ મારફતે માલ-સામાનની નિકાસને પ્રોત્સાહન આપવા માટે નેશનલ કોઓપરેટીવ એક્સપોર્ટસ લિમીટેડ (એનસીઈએલ), તથા દેશની સહકારી સંસ્થાઓ મારફતે ઓર્ગેનિક બિઝનેસને પ્રોત્સાહન માટે નેશનલ કોઓપરેટીવ ઓર્ગેનિક્સ લિમિટેડ (એનસીઓએલ) ઉપરાંત બિયારણના ઉત્પાદન, વિતરણ અને સંશોધનમાં ધ્યાન કેન્દ્રિત કરવા માટે ભારતીય બીજ સહકારી સમિતી (બીબીએસએસ) નો સમાવેશ થાય છે. આને કારણે કૃષિ ક્ષેત્રની વૃધ્ધિ, આહાર સુરક્ષા અને ભારતીય ખેડૂતોના કલ્યાણમાં વૃધ્ધિ થશે અને તે ભારતના સહકારી ક્ષેત્રની એકંદર વૃધ્ધિ અને વિકાસ તરફ દોરી જશે. તેમણે વધુમાં જણાવ્યું હતું કે જીસીએમએમએફ (અમૂલ)ને નિકાસ અને ઓર્ગેનિક્સ જેવી બે મલ્ટીસ્ટેટ સહકારી સંસ્થાઓના પ્રોત્સાહન માટે તક આપવામાં આવી છે.
Copyright © Copyright © anandtoday.com. All rights reserved